“Ole 43 ai lenei o tausaga ae o lea lava ma te avavaga.” E fai lava le tala ale tina o Vasati Fui ma ata nee, a‘o faalologo taliga o ana uo mai le Toomaga mo ē Puapuagatia, ise mafutaga faaleaoaoga na faia i Savaia Lefaga ile Aso Lua male Aso Lulu ole vaiaso talu ai.
Ole mafutaga faaleaoaoga lenei e tuufaasolo i itumalo o Upolu ma Savaii, ua faamauina le toatele ai o tina nofotane ua saili fesoasoani ane ile Toomaga.
Peitai ole faasoa a Vasati, sa faia ile agaga ole fiafia male mitamita ina ua oo mai nei lava o faatasi pea ma lana manamea ole 43 tausaga talu ai. Na talanoa tuusa‘o Vasati ma taena‘i mai ai le taimi o talavou lana nofogatane ile alii o Fui.
“Oute lē iloa se pologa e tusa ma lo‘u pologa”
“Oute alu faaputu popo taiafe, la‘u, o‘a ma sali, ae e ese mai le salipopo, le fatu aiga tausi male vaaiga ole ma fanau mai le tamaititi muamua ole 1972, e oo lava ile uii.”
E lē gata ole mamafa o galuega sa feagai ma Vasati, ole isi itu na pologa ai lona loto o faamatalaga ma upu sa lu‘i ai lana nofogatane. “O lo‘u toalua sa faigaluega lelei, sa galue ile ofisa ole Polenisia i Apia.” Ae nonofo atu male teine e leai se galuega, o isi na faamatalaga na sauaina ai lana nofogatane. “Ae sa ou inu lava iai, auā o lo‘u loto lava lea ua fai.”
Taumafai lona aiga e faasola i Niu Sila
Ole avagaga foi lenei na afua mai ina ua maua e Vasati tala mai lana uo, “o lana tama la na lau mai lona igoa ile lisi e alu atu ile ofisa o femalaga‘iga, e vaai le pule, o Tinoa Faleafaga. “Oi oute lei toe faatali ae ou fesootai loa iai pe moni le tala lenei, ae faapea mai, faapea oe e mafai e lo‘u aiga ona ave faamalosi a‘u i Niu Sila.” Ole taimi lena ua mafana le la faigauo ma ua mafana foi lona alofa faananau ia Fui, faapena foi ile alii ia te ia. Ma tonu ai loa e sosola loa e oo mai ai nei lava.
“Sa ou mā i iloa e nisi oute matua i lo‘u toalua”
“Tate manatua lava aso o ota talavou, sa ou mā lava e iloa e nisi oute matua i lo‘u toalua. Ae ina ua ma matutua loa, faatoa ta‘u sa‘o o‘u tausaga e 67.”
E toaono la‘u fanau, matua le tama ua 43 tausaga, lua le teine oi Niu Sila oloo faigaluega ai, lona tolu le isi tamaitai oloo faigaluega foi i Niu Sila, lona fā le tama oloo faigaluega i Samoa, lima le tamaitai oloo faia le tautua ale nofo aiga, ae uii le isi tama oloo faigaluega foi i Niu Sila.
Faafetaia le Atua i faamanuiaga
“Taimi nei, ua na ole vivii a‘e o lo‘u loto ile Atua ma faafetai i lana faamanuiaga, ole loto onosai male faamaoni, lea ua ou iai nei, ua uma lo‘u pologa, ae ua ou sifi i lo‘u toalua. A ou fia alu lava e tafao ile ma fanau i Niu Sila ma Ausetalia, pau lava ole ta‘u i tamaiti, ae ou lelelele iai e asi latou. E lē ose faasausili poo nisi manatu faamaualuga, ae sa lei faigofie taimi o lo‘u nofotane, lea ua ta inu lava iai.”
Tautino le alofa o Fui ia Vasati
I totonu o le Hall ale Ekalesia Faapotopotoga Kerisiano Samoa i Savaia, na tuuina atu ai male agaga atoa e Fui le fugalaau ua avea nei ma fugalaau e faalauiloa ai Samoa faalevaomalo, le Teuila, e faamanatu atu ai ia Vasati lagona o lona alofa mai le amataga o le la mafutaga e oo mai ile taimi nei.
