E 10 masina ua faasalaina ai e le faamasinoga le tama matua 70 tausaga e suafa ia Toso poo Limu M F Asiata, e nofo ai i lalo o le vaaiga a le faamasinoga i totonu lava o lona aiga, ina ua ia ioeina moliaga e 10, i lona faatinoina o galuega tau femalagaa‘iga e aunoa ma se laisene.
O ia moliaga na afua lea, ina ua tapa e ni tamaitai se toalua mai Porirua le susuga ia Toso mo se fesoasoani ile talosagaina o la pepa nofomau mo Niu Sila.
O se tasi o tamaitai nei e toalua, ua ova aso e nofo ai i Niu Sila, na ia totogi ia Tosi le $3,500 mo le faatinoina o lana talosaga, ma se isi vaega tupe e $1,300, e maunu ai le Minisita ina ia fesoasoani ile talosaga a lea tamaitai.
O le tausga lava lea 2013, na oo atu ai se tasi o tina ia Toso mo se fesoasoani mo ia ma lona aiga mo le talosagaina o le latou pemita e nonofo umi ai. O Aperila 2014 na iloa ai e lea tina e leai se talosaga na faia, ae ua ova foi o latou aso i Niu Sila.
Na ta‘ua i lipoti, na taulimaina e le NZ Immigration tusi talosaga mai ia Toso ile va o le 2013 ma le 2014, mo le talosagaina o Visa, o nei talosaga sa teena uma.
E talitonu le loia na tulai mo Toso, Peter Foster, e leai se sese o fautuaga ma le auaunaga na faatinoina e Toso mo i latou sa aafia, se‘i vaganā ai, le leai ose laisene e mafai ai ona ia faatinoina le auaunaga.
Ile folasaga a le tamaitai faamasino ia Judge Jan Kelly, o Setema 2013 na faailoa ai ele NZ Immigration ia Toso, e leai sona laisene o iai, ma e tatau ona talosaga sona laisene, ina ia mafai ona ia tuuina atu le auaunaga i tagata, peitai, na faaauau pea le galue o Toso e aunoa ma se laisene.
O suiga ile tulafono na faamutaina ai le toe tuuina atu e soo se tasi oni fautuaga tau femalagaa‘iga i tagata lautele e aunoa ma laisene, ina ia taofia ai le aafia o le toatele o tagata, ile totogi lea o tupe mo le talosagaina o Visa peitai e lē o faamaoni tagata sa totogi iai tupe. Ile taimi nei ua na o ofisa lava ma tagata taitoatasi ua faamatuu mai iai laisene oloo mafai ona talosagaina visa ma pemita, ma faatino auaunaga tau femalagaa‘iga.
Ose lapataiga foi lea mo le atunuu lautele, ina ia silasila toto‘a, e faigofie lava le taa‘ina i faaupuga, ae ao ina mautinoa pe o iai se laisene o le tagata oloo e talanoa iai mose fesoasoani tau femalagaa‘iga, a leai agai sa‘o lava ile ofisa o le Immigration mo se fesoasoani.
