Tamaitai sa tauva i lea po - Cecilia, Isabella, Hilda, Flora ma Taryn

Tamaitai sa tauva i lea po – Cecilia, Isabella, Hilda, Flora ma Taryn

E matagofie le maimoa atu a’o faauma aloaia ai tiute poo galuega faatausala a le tamaitai ia Vaiotausala Natalie Leitulagi Toevai i lona tofiga o le Miss Samoa New Zealand mai le tausaga 2017 seia oo mai i le tausaga lenei 2018, a’o tauaao aloaia atu ai loa le pale i le Tausala ua filifilia nei mo le tausaga 2018 seia oo atu i le tausaga fou 2019 le tamaitai talavou ia Cecilia Tufuga Fatu.

O le po o le Aso Toonai ua mavae 14 o Iulai, lea na faatautaia ai lena tauvaga matagofie i le Maota poo le Fale o Samoa i Magele, ma faia ai lena faaiuga na autasi iai afioga i faamasino filifilia o le po e ala i vaega tāua na autu iai tapenaga a tamaitai lalelei e toalima, faatasi ai ma togi poo maka na ausia e le tamaitai na maua i luga o le upega tafailagi lea na amata mai ai lenei faamoemoe.

I le sailia ai o se lalelei o Niu Sila i lenei tausaga, o loo maitauina pea le tupu ma ola o lenei faamoemoe i totonu o Niu Sila i tausaga taitasi, pe a fua lea i le toatele o tamaitai talavou o Samoa o loo pulunaunau e fia auai i lenei tauvaga i tausaga uma.

E pei ona faailoa e le afioga ia Ulalemamae Te’eva Matafai, o le Faatonusili lea o le tauvaga Miss Samoa New Zealand, e 28 tamaitai sa faatalosaga atu ma amata fai iai le faiga filifiliga. Alu a’i, alu a’i, le filifiliina o tamaitai ona totoe mai lea o tamaitai talavou e toavalu, ma o iina sa toe fai agai iai le isi filifiliga ina ia mafai ona totoe mai ni tamaitai se toalima e saili iai se Tausala Samoa i Niu Sila.

Le tamaitai sa avea ma Miss Samoa NZ 2017-2018, Vaiotausala Natalie Leitulagi Toevai i lana saasaaga mulimuli i lea po - Photo: Charles Palesoo

Le tamaitai sa avea ma Miss Samoa NZ 2017-2018, Vaiotausala Natalie Leitulagi Toevai i lana saasaaga mulimuli i lea po – Photo: Charles Palesoo

O le faiga filifiliga mulimuli na totoe mai ai loa tamaitai talavou e toalima e iai le sui mai Christchurch ia Cecilia Tufuga Fatu, ua 23 ona tausaga.

O lona tupuaga e mai afioaga i Samoa o Asau Savaii, Toamua, Levi Saleimoa, Solosolo ma Salelologa Savaii. O Isabella Fraser Fruen, ua 25 tausaga mai le afioaga o Lalovaea, Samatau, Faleaseela, Fagalii ma Satitoa.

O Hilda Nofoaofia Pitone Teleaga, ua 25 tausaga mai le afioaga o Tufuiopa ma Solosolo. O Flora Neemia, ua 21 tausaga mai afioaga o Uafato Fagaloa, Lalovi Mulifanua, Pata Falelatai, Talimatau ma le Aai o Niue, ma le tamaitai ia Taryn-Indianna Hainsworth-Faaofo, ua 19 tausaga mai le afioaga o Faleapuna, Magiagi ma Vaimoso.

Na iloga ona tumutumu le maota o Samoa i Magele i le po o le Aso Toonai i aiga uo ma e masani na agai atu e lagolago lo latou sui lea ua ofi atu i le sailia o se tausala Samoa Niu Sila, aemaise ai o le molimauina o lea faamoemoe e pei ona faataunuuina i tausaga taitasi.

O se faamoemoe ua leva ona fau ao fau po, ae ana le seanoa le alofa ma le faatasi mai o le Atua e le mafai ona faataunuuina ma le manuia lenei polokalame, e pei ona alalaga ma pepese ai le viiga o le Atua i lea po, e le aufaipese o le Auckland Gospel Choir aemaise o upu tomua a le taitai o le sauniga ia Rev Tone Leituala lea sa ia momoli ai le faafetai i le Atua ona ua tau lau o le faamoemoe i le sailia o se lalelei o Niu Sila.

Sa maualuga foi ma matagofie le sailia o se tausala ona o le toatele o aiga uo ma e masani, faapea kamupani sa tuu atu lo latou tau’au e lagolagoina malosi ai lenei polokalame. O le afioga i le Konesula Aoao o Samoa i Aukilani, Afioga Faolotoi Reupena Pogi, o ia sa saunoa mo le lauga faafeiloai. Na sosoo ai loa ma le saunoaga autu o le afiafi, lea na lafo ai le faaaloalo i le afioga i le tamaitai Minisita ia Hon Carmel Sepuloni.

Photo: Charles Palesoo

Photo: Charles Palesoo

O faafiafiaga matagofie eseese i pesega ma siva aemaise o le mālie o tala a le Fofoga o le po poo le MC, le afioga ia Tofilau Yolande Ah Chong na faanofo filemu ai le popole o le auvalaaulia ma le au tapuai faapea sui tauva.

Ae o le agaga fiafia ma le loto faafetai o le faatonusili o le Miss Samoa New Zealand le afioga ia Ulalemamae Te’eva Matafai i le tamaitai ia Vaiotausala Natalie Leitulagi Toevai, ona o ona tiute sa galue mai ai i lenei tofiga a’o tulai mai i le tofi mai le la tausaga seia oo mai i lenei tausaga.  Na faaleo foi lana faafetai i sui e toalima ua mafai ona auai i faalagamaea o le Miss Samoa Niu Sila i lenei tausaga faapea o latou aiga, aemaise ai o kamupani ua latou lagolagoina lenei faamoemoe.

I le iuga o le tauvaga ua taunuu ai le upu, e le mua uma ni vaa, ae o le viiga o le Atua ona ua faataunuuina ma le manuia le faamoemoe o le po, e pei ona molimauina e le toatele o le mamalu o le atunuu, aemaise ai o i latou sa maimoaina le sailia o le Miss Samoa New Zealand i luga o upega tafailagi e pei ona faasalalau tuusa’o ai e le Radio Samoa i luga o lana itulau o le facebook.

Faapaleina le tamaitai o Cecilia - Photo: Charles Palesoo

Faapaleina le tamaitai o Cecilia – Photo: Charles Palesoo

O faailoga faapitoa e lē o aofia ai i faaiuga a faamasino:

Friendship Awards – Flora Neemia

Personality Awards – Cecilia Tufuga Fatu

Photogenic Awards – Taryn-Indianna Hainsworth-Faaofo

People’s Choice Awards – Cecilia Tufuga Fatu.

Cecilia Tufuga Fatu - Miss Samoa NZ 2018-2019 - Photo: Charles Palesoo

Cecilia Tufuga Fatu – Miss Samoa NZ 2018-2019 – Photo: Charles Palesoo

Faailoga lautogia mai Faamasino:

Best Siva Samoa Award – Cecilia Tufuga Fatu

Best Introduction Awards – Flora Neemia

Best Talent Award – Flora Neemia

Best Interview – Taryn-Indianna Hainsworth-Faaofo.

Miss Samoa New Zealand 2018 – 2019 – Cecilia Tufuga Fatu

1st Runner Up – Flora Neemia

2nd Runner Up – Hilda Nofoaofia Pitone Teleaga

3rd Runner Up – Taryn-Indianna Hainsworth-Faaofo

4th Runner Up – Isabella Fraser Fruean.

Le tamaitai o Cecilia ma lona tina (itu agavale) ma lona tauaiga - Photo: Charles Palesoo

Le tamaitai o Cecilia ma lona tina (itu agavale) ma lona tauaiga – Photo: Charles Palesoo

MISS SAMOA 2018 part 1

MISS SAMOA 2018 part 2