Ua alaga nei e se tasi o Alii faasalalau na taalo muamua mo le Socceroo ia Robbie Slater, o le alo o Samoa ia Tim Cahill o le tama taalo aupito silisili lona matautia i taaloga uma i totonu o Ausetalia e aafia ai le Liki, AFL ma le lakapi Iuni.
O lenei faaaliga ua ioe i ai le toatele i lenei atunuu tele aemaise ai Samoa na molimoli i ai alofaaga o Tim Cahill i luga o le televise a o molimau le atunuu pe a alo lana paopao i le taimi e sikoa ai.
O faamanuiaga i lenei alo lotonuu o Samoa o loo gasolo mai pea e pei ona iai le sikoa faalua ma manumalo ai Ausetalia ia Saina 2-0 i le quarterfinal ma sao atu ai loa Ausetalia i le Semi ma UAE sa faia i Newcastle. O le sikoa muamua a Tim i le taaloga ma Saina o se gaioiga (Bicycle) na uluai faatino e Pele o Brazil i le ata tifaga o le ‘Escape to Victory’.
I le sikoa lona lua a Cahill na vaaia ai lana osofai masani ua lauiloa ai mai lona ao (head) ma ulu ai le polo i le neti a Saina mo ‘ai faaiu e 2-0 ma sao ai Ausetalia i le Semifinal. Ua atoa ai foi le tolusefuluiva (39) o ana sikoa faalevaomalo mai taaloga e valusefulu (80) mo Ausetalia.
E sili lenei matati‘a nai lo se tasi foi alii soka iloga i le lalolagi ia Christian Ronaldo o Portugal e limasefululua (52) sikoa mai taaloga e selau sefuluvalu mo Portugal. O le isi fetu pupula o le soka ia Lionel Messi o Argentina e na o le fāsefululima (45) ana sikoa mo lona atunuu mai taaloga e ivasefuluono (96).
O le faatinoiti o Cahill ae ua tolusefululima ona tausaga o loo sili atu pea i le toatele o sui talavou o aufili a isi atunuu malolosi. I totonu o Ausetalia e toavalu ana sui tauoloa aupito matautia (immortals) ma le AFL e aofia ai Gary Ablett, Wayne Carey, Buddy Franklin ma Leigh Matthews ma le Lakapi Iuni o John Eales, David Campese ma Israel Folau, ae peitai o le avea o le Soka o le taaloga numera tasi i le lalolagi ma le gafatia o mau sikoa e Tim Cahill i Ipu o le lalolagi ma Ausetalia, ua manatu ai o ia le tama taalo aupito maualuga lona faatulagaina i le totonu o lenei atunuu.
O lona loto alofa i ona mātua, uso ma tuafāfine aemaise le atunuu pele ia Samoa ua fai lea ma mitamitaga i le atunuu e pele faapea Ausetalia o loo avea ai ma lupe faalele. “A ou taalo mo le Soccerroo ou te fai foi ma sui o Samoa i lenei faagatama,” o se molimau lea a Tim i luga o le Instagram.
Afai e manumalo i le Ipu aoao a Asia ua mautinoa lava le faatuina o se faatagata faamanatu (statue) i le atunuu nei ma tupulaga fai mai le sao o lenei alo Silisili o Samoa.
