Na mataina le taaloga amata a le Reds ma le Brumbies lea na lami ai Brumbies i le 47-3 aemaise le toatele o alo o Samoa na auai i ‘au nei e lua a Ausetalia. E toalima tama Samoa o le Brumbies ia Scott Sio, Joe Tomane, Mtt Toomua, Chris Lealiifano ma Lausii Taliauli.
O le Reds a Kuiniselani sa aofia ai Karmichael Hunt, Chris Feauai Sautia, James Jerry Taulagi, Sef Faagase ma Duncan Paiaaua. O le toatele o i latou nei o sui fou a le Reds. Na vaaia le poto masani o tama tuai o le Brumbies ma sikoa faaono ai, lea e aofia ai ma sikoa taitasi a tama Samoa ia Joe Tomane le uigi, ma Matt Toomua le fesi.
O le alii ia Christian Lealiifano le numera sefulu lua na maua ai ‘ai e luasefulutasi a le Brumbies mai sala e fā ma sikoa na ova e tolu. E manatua pea i Samoa i le faaiuga o le tausaga talu ai Chris Lealiifano na malaga atu i Samoa ma tauaaoina atu ai se togiga mo le kalapu a Maagiagi lea e tupuga mai ai lenei lupe faalele.
O le sala e tasi a le Reds 47-3 na mauaina lea e le alii Samoa Rarotonga ia Karmichael Hunt lea na iloga i le lakapi liki mo le Broncos faapea le Kangaroos a o lei saini e taalo mo le AFL poo le lakapi Ausetalia.
I le tausaga lenei o le Ipu o le lalolagi ua amata sauni ma tapena atu foi tama taalo uma mo ni o latou avanoa e filifili ai i aufili a Ausetalia, Niu Sila faapea Samoa i ‘au o loo tausinio ai i le Super XV o lenei tausaga.
