“Ua sefulu tausaga ae o lea faatoa toe faia se siitaga ole totogi o a tatou Tusifolau ma Pemita”…Agafili Shem Leo
Ua gugulu lagona ole toatele sa tuu fesilisili iai poo le ā so latou manatu ile siitaga fou lea ua faailoa ele Pule Sili ole Matagaluega ale Palemia ma le Kapeneta le tofa Agafili Shem Leo, ole tau o Tusifolau Samoa ma Pemita e ulufale ai ile atunuu aemaise ole totogi o sitiseni Samoa. E limasefulu tala ua sii ai le tau ole Tusifolau mai le $200 tala oloo iai nei. O lona uiga a oo atu ile aso 9 ole masina fou o Oketopa ua $250 ae sefulu tausaga lava le umi ole aogā ole Tusifolau.
Na valaau se feiloaiga ale Pule Sili ole Matagaluega ale Palemia ma tusitala e faailoa ai le siitaga ma faamalamalama ai le mafuaaga. Na faaalia ele tofa Agafili le Pule Sili ole Matagaluega e iai ma le vaaiga ole vaega o mataupu tau femalagaa’iga, o lea faatoa faatino se siitaga o nei auaunaga ale Malo talu mai le sefulu tausaga ua mavae. Ole mafuaaga ona ua maualuga le tulaga ole tāua ole Tusifolau Samoa i lona tulaga faavaomalo ma ua sii ai foi le totogi e saunia ai.
Ole anagata foi ole faiga ole tusifolau ole isi lea pogai ole sii ole totogi e maua ai. Palasi ane i pemita e ulufale ai tagata o isi atunuu i Samoa faapei o tagatanuu o Amerika Samoa oloo selau limasefulu tala le totogi ile taimi nei ae oo atu ile aso 9 o Oketopa 2017 e faamamalu ai le siitaga fou ua $200 tala.
Ole tau fou ole CI poo le Certificate of Indentity ole a $60 tala mo tagatanuu o Samoa ae mo i latou e le oni sitiseni ole a 200 tala. Ole tuuina i totonu ose Tusifolau ose suafa matai poo le suia ole faaiu pe a faaipoipo e 60 tala ma le faafouina ose tusifolau ise tulaga faanatinati e 60 foi tala lona totogi.
O sitiseni Samoa mo se tagata mai se isi atunuu na fanau i Samoa e 60 tala, sitiseni ona ose sootaga ise tagatanuu Samoa e 150, sitiseni ona ua faaipoipo ise tagatanuu Samoa e $5,400, toe faamaninoina ma le faamaonia ose tulaga tagatanuu Samoa e $3,200 ma se talosaga mo le toe iloiloina ose talosaga ise sitiseni Samoa ua teena e $1,500 tala lona totogi. Ole faailoa lautele ole siitaga fou o nei vaega tāua sa amata agai ai nisi e mae’a le aogā o tusifolau ile faaiuga ole masina nei o Setema ma le faasolo atu i masina faaiu o lenei tausaga e toe talosaga ni tusifolau fou ina ua lē fetaui ai ma le totogi fou.
Peitai ole faamaninoga o lea tulaga mai le vaega o femalagaa’iga, e le mafai seiloga e mae’a lelei le taimi e aogā ai le tusifolau.
