“O le mafuaaga lea na ou faamavae ai ae tauva i le tofi faipule”…Lefau Harry Schuster
O le faia o le monotaga i totonu o le nuu o se tautua a soo se matai Samoa. Peitai ua avea le monotaga ma lavelave tuga i le aiā tatau o soo se matai Samoa e fia avea ai ma sui tauva e sailia ai tofi faipule o le Palemene.
O matai o loo aumau ma nonofo i isi atunuu ua faalavelaveina lo latou aiā tatau e fia tauva ai i se nofoa o le Palemene, pe afai e lē faamalieina le aiaiga fou o le tulafono o faigapalota, o le faia o le monotaga tusa lava pe atoa le 340 aso poo le tolu tausaga o nofo ai i Samoa.
O le aiaiga sa iai muamua i le tulafono ae ua aveesea, o soo se tagatānuu Samoa ua umia se suafa matai ma ua lesitala faaletulafono e mafai ona avea ma sui tauva. Seia vaganā le aiaiga na faaulu i ni tausaga ua tuanai e lei mamao na aiaia ai le tatau i lea matai ona nofomau i Samoa i totonu o le tolu tausaga.
O le afioga Lefau Harry Schuster o se tasi sa avea ma faamasino ae o se loia o loo sauni e tauva mo nofoa e lua o Vaimauga i Sisifo i le Palemene.
“O le aiaiga fou lea i le monotaga i lo‘u talitonuga e lē talafeagai. Ua aafia ai le filifiliga saoloto a le tagata ua iai le suafa matai, aemaise ua faatulaga mai foi i le aiaiga, o le pule atoa e faia ai le faamaoniga poo fai se monotaga a lea matai, ua ave i le Pulenuu”.
I le finagalo o Lefau na ia faaalia ai foi, pe afai e manuia le Tautua Samoa ma tulai mai o le isi faigamalo fou, o le a toe silasila i le aiaiga ua pasia e le Palemene ina ia faia se suiga e mautinoa e lē afaina ai aiā tatau o tagatānuu o Samoa.
O le mau a se tasi o matai e matai i se afioaga o Savaii ae leai sana monotaga seia vaganā faalavelave o lona aiga ma le nuu e fai ai ana mea o saoga, e aliali mai i le teuteuga ma le aiaiga fou ua noatia ai foi ma lona aiā tatau, auā sa tatau ona matuā manino le aiaiga o le tulafono poo ā tonu mea e faasino i ai le monotaga.
Na faaalia foi e lea matai o nisi o tamalii ma failauga o le atunuu o aumau i fafo ae leai ni monotaga o faia o le a aafia ai. “O se afaina lē faatuaoia lenei ua fai e le Malo, ma e tatau ona toe aveese lea aiaiga”.
O le finau a Lefau na ia faaalia ai o loo manino le faavae o Samoa, e soo se tagatānuu e iai le aiā tatau e tauva ai pe a ia umia se suafa matai, peitai ua faavasega mai e le aiaiga o le tulafono le ituaiga o tagata e agavaa. “I lo‘u lava talitonuga faaloia i le tulafono, e lē talafeagai ona e foliga e faailoga tagata”.
