“E leai se latou pule e faia ai lena faaiuga”..Taulapapa Faamanatu Nielsen
Ua vevela pea fetauiga i totonu o le sosaiete o le mai suka i Samoa, ina ua faamalolo e nisi o sui ua latou faaalia o latou ua iai le vaaia ma le pulea o le sosaiete, tofi o le Sui Peresitene le afioga Taulapapa Fesolai Faamanatu Nielsen, ma le Failautusi o Solialofi Papalii.
O le fono a se vaega o le sosaiete na taloina, na faia ai se palota o le le faatuatuaina (vote of no confidence) ma aveesea ai tofi o faletua ua taua o la suafa.
O le fono foi lea na filifilia ai ma se fono faatonu fou e tauaveina galuega a le sosaiete e pei ona filifilia le Teutupe fou o Theresa Ah Yen Duffy, sui teu tupe o Toleafoa Vainalepa Tavita, o le tausi soifua mo le komiti faatonu o Loretta Ainuu, ma le fomai o le toalua o le tausi soifua filifilia o Leota Dr Joe Ainuu.
O i latou ua filifilia o loo matua tetee i le sui peresitene ma le failautusi i le tulaga ua aliali mai i le faaaogaina o tupe ma meatotino a le sosaiete.
Faaalia e Toleafoa Vainalepa Tavita Nikolao, ua tele faaletonu ua aafia ai ona ua leai ni tupe, ma e le o iloa foi pe sa faapefea ona faaaoga tupe sa maua mai i le Matagaluega o le Soifua Maloloina e $20 afe i le tausaga, ma foai tupe a le faalapotopotoga faavae o le mai suka a le tina o Lanuola Keil ma ona alo.
O le aveesea o tofi mai le faletua o Taulapapa Faamanatu Nielsen ma Solialofi na faaalia e Toleafoa Vainalepa Tavita o loo talafeagai ma aiaiga o le faavae o le sosaiete.
“O loo manino lava e na o le tolu tausaga e mafai ai ona saofai se isi o le komiti faafoe i se tofiga ona alu ese lea, ae o le mea lea ua fai e loomatutua ia, ua saoloto ai lava laua pei se meatotino a o la aiga le sosaiete”, na saunoa ai se tasi o sui o le komiti fou ua talosaga mai i le tusitala e taofi le faailoaina o lona suafa.
Tetee i le faaiuga
Ua faaalia e le sui Peresitene o le sosaiete e matua leai se pule e mafai ai ona aveesea tofiga o loo ia umia faatasi ai ma le failautusi, ma o loo tumau pea ona avea i laua ma sui o le laulau o le Komiti Faatonu.
O i latou ua filifilia e le o talafeagai le tulaga ua latou faia, ma e soli faavae le gaioiga ua latou fai, seia vagana ua talo se fono tele a le faalapotopotoga.
“E leai se pule a se isi e aveese ai tofi seiloga lava o le finagalo o le sosaiete i ona sui auai”, o le finagalo lea o Taulapapa Faamanatu Nielsen i le talanoaga ma le tusitala.
“O loo taumafai e faatino le fono lena i le masina nei ona iloa ai lea poo ai o le a filifilia”, na toe faaopoopo mai ai le sui peresitene.
O loo fuafua e fono le Pule Sili o le Matagaluega o le Soifua Maloloina le faletua o Palanitina Tupuimatagi Toelupe, ma sui o le Komiti Faatonu faapea faauluuluga o le matagaluega ona soalaupule ai lea o le mataupu i se auala filemu e fofo ai le faaletonu ua oia ai le lotoifale o le sosaiete.
Ae na saunoa mai le sui peresitene o loo finau o loo tumau pea ona tofi, o le tausaga e 1995 na faatuina ai le sosaiete mai suka, peitai na toe faaolaola e le sosaiete a alii ma tamaitai tausi soifua i le tausaga e 2001 seia oo mai i le taimi nei.
Fai mai Taulapapa o le fono e filifilia ai tofi e le o faamoemoe e faia ai ma le tala o le tupe seiloga o le fono tele faaletausaga e usuia ia Mati o le tausaga fou.
“E le o iloa lava i ai pe fai ai ma le tala o le tupe i le fono e sue ai tofi”, o le finagalo lea na toe taotaotua mai i le finagalo faaalia o Taulapapa.
