E fetaui ma talafeagai le aveese o le tofi faifeau malolo manumalo, toe taofi le penisione, ae ua afulelea ma sinasina le lauao, ua 89 foi tausaga o tautua ma galue punouai i le galuega a le Atua?
O le tulaga lea sa iloiloina ma ua oo i ai se faaiuga a toeaiina o le Matagaluega a Niu Sila i Matu, ina ua laga se mataupu e faapea ua liulotu, poo ua sui le ekalesia e tapuai ai se tasi o toeaina malolo manumalo a le ekalesia EFKS.
E tusa ai ma se lipoti sa faamatuuina mai e se tasi o tagata lotu o le ekalesia, sa faamatalaina ai uma le tulaga sa oo i ai le faaiuga a le Tofiga a le Matagaluega i Matu talu ai nei. O le toeaina ia Lisale Tu, o le toeaina malolo manumalo, sa tausinuu i Fagaloa i tausaga ua mavae, o ia tonu lea ua faasaga tonu i ai lea faaiuga.
E tasi lava le mafuaaga sa faamaonia ai le faia o lea faaiuga e le au toeaina i Niu Sila i Matu. O se faamatalaga e faapea, ua liliu le toeaina i se tasi o ekalesia. O lona uiga ua alagatatau foi la ona taofia le penisione o loo soloai ane i le tamā o le ekalesia.
O Lisale ma lona faletua, ua loa tausaga o tausi ekalesia i Fagaloa e pei ona faamaonia mai, peitai na malolo ai ina ua faamuta tausaga galulue, ma o loo aumau ai i Niu Sila. O le tamā malolo manumalo foi, o loo lolotu ma agai i le ekalesia EFKS i Westmere, talu lava ona taunuu mai i Niu Sila.
Peitai o le tala ua salalau nei, ua ta‘ua ai o le faaiuga o le taofia o le penisione, ua aga atu nei mo se faaiuga mautu mai Samoa i le nofoaga autū o le EFKS. E ui ina ua folafola ma ua agaiga foi lea faaiuga i le taimi nei, peitai faato‘ā faamautu ma faamaonia pe a taunuu i Samoa, ma toe faia i ai se isi iloiloga a le komiti o toeaiina o le Ekalesia Aoao. O se mataupu o loo matuā teena malosi e sui o le aiga o le tamā malolo manumalo ia Lisale Tu, ona e talitonu i latou e matuā sese i Sini, ma e lē sa‘o lea faamatalaga, atoa ai ma se faaiuga ua faia e toeaiina i Niu Sila.
O loo matuā ave le faaseā a sui o le aiga, i le toeaina taitai ma lana taitaiga ona e foliga mai, e iai se fesootaiga o lea faaiuga ma le tulaga o loo taoto ai nei le mataupu a le ekalesia i Westmere, lea e galulue ai Lisale ma lona faletua.
O se talanoaga mai le sui o le aiga ina ua fesootai mai ma tuuina mai lea faamatalaga, na ia ta‘ua ai ma le faamaoni, o Lisale o loo iai i le itu e lē lagolagoina le faifeau o loo tulai nei i le galuega.
O Lisale Tu, o loo talitonu lona finagalo i le mafuaaga ua savavali ese ai ma tuua le ekalesia e le isi vaega, lea ua vaeluaina i ai le EFKS i Westmere.
E talitonu le aiga, o le mafuaaga tonu lea o le taumafai o le komiti a toeaiina e mimilo le mea moni ma le mea sa‘o ina ia matuā sese, ma tele ai se aafiaga o le tamā ia Lisale ma lona faletua. E mafua ona teena e le sui o le aiga lea faaiuga ma ia ta‘useseina, ona e leai se moni ma se faamaoniga o lea faamatalaga i le liulotu.
O ai na ia uuina le lima o le tamā malolo ma faamaonia ua liulotu, pe sui foi le tapuaiga a le tamā? O le tali e leai se isi, ua na o faamatalaga feaveai e le matagi, e lē sa‘o. Aisea na lē tapa ai ma fesiligia le tamā, ae lē aami e talanoa i ai pe faamaonia lea tulaga ona fai ai lea o se faaiuga sa‘o ma le tonu.
Sa matuā teena ma lē talitonuina e le sui o le aiga se mea faapea o le a tulai mai, aemaise lava o toeaiina ma taitai o loo tulimatai uma i ai le tonu ma le sa‘o o le galuega. Sa ta‘ua foi e lea lava sui, lona matuā ofo, ona o faiga faapolokiki ua tauau ina mate ai lagona ma le moni, aemaise o faiga faavae sa sau ai le ekalesia.
Ua leai ma se manatu o taitai ma toeaiina i le tautua matavela, ma le auaunaga ua afu lelea a lenei tamā, a o lea ua aliae faiga faapito ma le piopio. E leai se isi o toeaiina o iai nei ua oo i le malolo litaea e pei o Lisale, a o lea ua nonofo ma fai le faaiuga o le tagata ua malolo manumalo mai le galuega, ona o se mafuaaga palapalā ma le eleelea.
E fai si mamafa o lafoga sa faaleo ai tuuaiga a le sui e pei ona aumai, peitai o le taumafai pea ina ia auina atu i se auala faaaloalo ma le ava fatafata, aemaise ai o toeaiina o auauna foi a le Atua. Ae ui i lea sa malie le finagalo o le sui, i le gagana a le tusitala e auli ai lagona o le tiga ma le lē fiafia.
O le faaauau o le tiga ma le ita i lea faaiuga, ona o le nini faatasi o mataupu mamā, ma mataupu eleelea e leai se agaga faamalosi e maua ai, pe suia ai se manatu o se isi, ae na o le atili feula ai o le afi i loto ma manatu o tagata. Ua 89 nei tausaga o le matua o le toeaina ia Lisale, ma sa taumafai atu i ai i le toeaina mo se fesootaiga ma sona finagalo i le tulai mai o lenei mataupu.
O se faaaliga a le tamā malolo manumalo e tauala mai i le tina le faletua ia Valelei, sa ta‘ua ai le fiafia tele o le toeaina e tali le faaiuga ua faia. Saunoa manino le tina, o le finagalo o le tamā ia Lisale, e faanoanoa ona o le auala ua faia ai le faaiuga e lē moni, ma e leai foi sona sese ma se agasala.
Ae fiafia lava lona finagalo ma faapea ane, e leai lava se mea o iai, e pule lava foi latou e faia faaiuga, poo fea lava e fai agai i ai. O le mea sili ia te ia, o le mamā i le mafuaaga e pei ona ta‘ua. O loo lotu lava foi i le EFKS e pei ona sa galulue ma malolo mai ai. Afai lava o le faaiuga lea, o le aveese o ona tofiga toeaina, aveese ma le penisione o loo maua mai, ia e talia lava ma le fiafia. Ae afai e iai se isi mafuaaga o lafi ai tua, ona alofa ai lea ona o le silafaga a le Atua, o Ia e finagalo i le mea moni ma le sa‘o.
Sa ta‘ua e le faletua ia Valelei, le tulaga i le taulaga tupe sa saunia e latou aulotu, ma o le vaega lea o le a toe saili manino e le Samoa Times i le vaiaso fou, ma toe tulituliloa pea toeaiina, ona o le mataupu e pei ona lomia. O le taulaga sa ta‘ua e le faletua e faapea sa toe faafoi ane e lē talia, peitai e pei ona faailoa, e lei manino tele i ai i lona auiliiliina, ma o le a taoto ai faapea, seia aulia le vaiaso fou.
