Aveese le tapulaa – Palemia o Samoa

O le finagalo lea na faaali e le alii Palemia o Samoa, le susuga Tuilaepa Lupesoliai Sailele Malielegaoi i le numera o tagata o le Pasefika lea ua tatala i ai avanoa faigaluega faavaitaimi i totonu o Niu Sila.

O le tausaga na tea nei na oo atu a i le tapulaa mai i le Ofisa o Femalagaaiga a Niu Sila i le to‘a 6,000 ae o lea na faapea mai le Minisita o Femalagaaiga a Niu Sila e 5,500 avanoa na faaaogāina. Peitai o le mau a le Palemia o Samoa, e tupu le tau taofiofi o le ave o avanoa ona o le numera poo le tapulaa lea e aumai i Niu Sila. O le talosaga a le alii Palemia aveese le tapulaa ae tatala le avanoa i soo se tasi e saili galuega atu.

O le mau a le Minisita o Michael Woodhouse, ua matauina le finagalo o le Palemia o Samoa peitai e ave lava le faamuamua a togalaau ‘aina i totonu o Niu Sila i tagatānuu o Niu Sila ma o avanoa e totoe ia e maua ai galuega faavaitaimi ua ofo mai i le Pasefika. Na faafetaia e le alii minisita le sao o tagata o le Pasefika i lenei galuega tele.

O nei felafolafoaiga na faia i le fono faaletausaga mo galuega faavaitaimi lea na usuia i le faaiuga o le vaiaso na tea nei i Apia. O le taimi muamua lea ua faatautaia ai lenei fonotaga i fafo atu o Niu Sila ona o le valaaulia a le alii Palemia o Samoa i lana malaga atu i le tausaga na te’a nei i le fono lava faapenei.

O le avanoa lenei na mafai ai e kamupani o loo faafaigaluegaina tagata o le Pasefika ia latou faatoaga ma atinae i Niu Sila, ona maua le avanoa e molimauina ai le tulaga ua iai suiga o aiga ma o latou tamaoaiga ona o avanoa faigaluega nei ua maua.

O nisi ua tele tausaga talu ona aofia ai i lenei polokalame ma ua faapea ona maua ai atinae i Samoa e pei o pisinisi laiti o taavale la‘upasese, e lē gata i lea o nisi ua fau fale o aiga ma ua agai nisi e faatutū atinae e pei o ni alii ua fausia le piliki. O nisi o vaa fagota ma ua maua uma ona o le fesoasoani a galuega faavaitaimi nei.

O le fono tele lenei e tolu aso na faatautaia ai ma na asia foi ma le motu tele i Salafai e sui usufono ma faaiu ai i le Aso Toonai lea faamoemoe.

Mai i le to‘a 6,000 ua tuu mai e oo i ai le maualuga o le aufaigaluega faavaitaimi e to‘a 1,200 e mai i Samoa lava ia, ma o le mafuaaga lea o le manaoga o le malo ina ia tuu atu i luga lea numera auā o Samoa lava ia e toaele i tagata o loo maua avanoa nei mai i Niu Sila.

Afioga i le alii Palemia o Samoa, Tuilaepa L.S Malielegaoi, ma le sui o le malo NZ