O le saunoaga lea a le Alii Minisita o Aoga, Taaloga ma Aganuu, i le amataga o le vaiaso i se feiloaiga e faalauiloa ai fuafuaga faataatitia a le Matagaluega o Aoga mo le isi tolu tausaga o lumanai.
O se fuafuaga ua unai ai aoaoga eseese o loo ua faagasolo mo le fanau mai i Aoga Amata seia oo lava i aoaoga maualuluga i Iunivesite.
O loo faaauau mai ai foi ma galuega tuua o le tolu tausaga ua mae‘a atu ma o loo matauina o loo tele lava fuafuaga na faataatitia mai ua faataunuuina aemaise lava i suiga tetele ua iai nei le aoaoina o faiaoga, le unaia o aoaoga o tomai faapitoa, o le faaleleia atili o aoaoga mo fanau e iai manaoga faapitoa e ala i le tuufaatasia ma aoaoga a le malo ma le vaavaai i le galuega fou lea ua iai nei ina ia amata atu lava i aoga amata (pre-schools) le pulega ma le taitaiga a le Matagaluega o Aoga.
Ae i le tatala aloaia o lenei fuafuaga a le Matagaluega na laga ai loa e le Minisita o Aoga, Taaloga ma Aganuu le faatāua ua tatau lava ona faamalosia i faiaoga.
“O le tele o taimi a talanoa ma faiaoga i mataupu e tatau ona faaleleia ai le tulaga o aoaoga a le fanau i Samoa, e na o siitaga lava o o latou totogi e agai i ai faiaoga, e lē talanoa mai i faafitauli i mataupu ma le aoaoina o le fanau, ae na o latou siitaga lava ma auala e faaleleia ai i latou ma le latou feagai ai ma le faatinoga o le auaunaga ae e leai ma se talanoaina o le fanau,” o le saunoaga lea a le alii Minisita. “O se papala lenei ua tatau lava ona tape i le taimi lenei,” o lana faaopoopo lea.
Faaalia e Magele, ua tatau i faiaoga ona sagai ane, auā o le tele o o latou manaoga na lagalaga mai lava i le suiga o le Pulega ua iai nei, ua agai nei le malo e ala i le Matagaluega ina ia faatino e pei ona iai nei avanoa sikolasipi i le faamautu ai o tikeri o faiaoga i le faasaienisi ma le numera.
O le agai loa e taofi galuega a faiaoga e lei ausia tikeri ma ua faatupe ai e le malo le toe foi e aooga o faiaoga uma e na o tipiloma faailoga ua maua. E lē gata i lea o totogi o faiaoga lea ua faagasolo ona faia a latou siitaga.
Peitai na faaalia e le alii Minisita e tatau nei loa ona agai ane faiaoga e faatino loa suiga e tatau ona iai i le aoaoina o fanau ona o lea e foliga mai e lē o ano i fanau ma le lumanai manuia e tatau ona oo i ai.
O le tele o suiga nei ua aofia ai ma le faaopoopo o le itula auā aoaoga poo le unai o taaloga a le fanau i aoga taitasi. O le faitautusi ma le tusitusi e lē o i se tulaga lelei e pei ona laga pea e le Matagaluega.
“Ia silafia e faiaoga, o le lumanai manuia o soo se atunuu e faalagolago i fanau e atamamai ma a lē faia le galuega a faiaoga e lē ausia le ola o se tamaoaiga o se atunuu e ala i fanau e lelei aoaoina,” o le saunoaga lea a le afioga Magele.
O le faamuamua na saunoa le alii Minisita o fanau ae e lē o faiaoga ma o lea ua faamuamua le unai o faiaoga ma o latou taui poo faamanuiaga ma o le a tulimatai nei le fuafuaga faataatia lea ua faalauiloa nei pe savavali faiaoga i le latou tautoga ma folafolaga ua fai ina ia siisii le tulaga o aoaoga a le fanau i Samoa nei.
