“Ua aafia ai se tamaitai e iai manaoga tumau”
Ole tiute ole tulafono ole puipuia o tagata uma ma a latou meatotino. Ole tiute foi ole tulafono ma le faamasinoga ole faia o faasalaga talafeagai e aoaoina ai tagata ole atunuu aemaise oi latou o fuafua e faia ni solitulafono mamafa e leai se avanoa o ia faiga i lalo ole tulafono. Ole tamā 59 tausaga lona soifua ose matai ise afioaga ua faatulai ese ma lona nuu ma ua aveese foi ma le suafa matai o lona aiga sa ia umia ona ole ogaoga ma le matagā ose gaioiga na ia faia ise tamaitai 32 tausaga ole soifua e iai ona manaoga tumau. Ose gaioiga na tupu a’o faasuaavā le tamā ma na tupu ise nofoaga e leai nisi e nonofo ai.
O tei ole tamaitai na aafia na o ile faleoloa e faatau ma sa fafa e se tasi oi latou le tamaitai e iai manaoga tumau. Na fetaui le oo ane oi latou ise nofoaga tuufua ae faafetaui ai ele tamaloa 59 tausaga ma ia faia ai se gaioiga matagā ile tamaitai 32 tausaga le matua.
Ole faamaoniga ole iai o ona manaoga tumau ona e ui e mafai ona talanoa ise tagata ae o ana tala oni tala ase tagata e laititi tausaga le matua. Na faamatala lea tulaga ele uso ole tamaitai na aafia ile faamasinoga.
“Ae lei taofia pe ma’i foi le tamaitai lea o L sa malosi lava le tino, malosi le savali, malosi foi le taumafa ma le inu. Ae se’i vagana ai lava lana tautala e tau le malamalama ai le toatele o tagata. Ae e malamalama foi o ia pe a fai atu iai se tala, e mafai foi ona talanoa mai ae le atoatoa lana talanoa e pei ose talanoaga ma le tamaititi laititi.”
Na kisi lē ua molia i laugutu ole tamaitai ma ia faia foi iai se gaioiga matagā a’o pupula iai mata o tei laiti ole tamaitai.
Ose tasi o ona tei tama laititi e 6 tausaga le matua na ia faamatala i leoleo le mea na tupu, ma ole saunoaga ale faamasino le afioga Vui Clarence Nelson ose gaioiga ole a lē galo ile mafaufau ole tamaititi i lona ola tupiutupu a’e.
Ua faamaonia le moliaga ole tamaloa o To’a Mafuto’a ma ua nofosala ile falepuipui mo le fitu tausaga. Faaalia ele faamasino le afioga Vui e aliali mai ile lipoti ale ofisa faanofo vaavaaia le leai ose agaga salamō o lē ua molia ona sa ia teena lona faia ole solitulafono.
Ole lipoti foi na tuuina atu mo sona lelei na faia e se faifeau o sona tausoga ae sa tatau ona saunia le lipoti ele faifeau o lona nuu oloo lotu ai, auā e silafia e lana faifeau lona tagata ma lana amio aemaise o lana tautua lotu.
Ose faanoanoaga ile faamasinoga ona ole olaga ole tamaitai na aafia e lei tele ni tausaga na auai ile a’oga ma sa lē faailoaina foi ona manaoga tumau e lona aiga i auaunaga, oloo ofo fua mai e pei ole aoga ole SENESE, e iai foi auaunaga e mafai ai ona faia se galuega fesoasoani mo tagata e iai manaoga tumau.
Ole fitu tausaga ua faasala ai ile falepuipui lē na molia ua faatonuina ele faamasinoga e toese ai le taimi sa nofo taofia ai a’o faia suesuega a leoleo ma faatali se faaiuga ale faamasinoga.
