Aveese le leoleo mai se aumalaga i Aferika – tuua‘ia i le taufaamalosi o se tamaitai tusitala

O se alii satini sinia o le Matagaluega o Leoleo i Apia ua tuu atu nei i ai le faasalaga a o suesueina i le taimi lenei. O lea faasalaga o le a lē malaga ai i se misiona poo se aumalaga a leoleo ua fuafua e galulue mo Aferika ae o ia lea na tuu e taitaia lea aumalaga.
O le mafuaaga o se tuua‘iga ua taatia nei i le ofisa o Leoleo a se tamaitai tusitala ua ia tuua‘ia ai le taumafai o lenei alii e faia se la faiga aiga a o sulu atu mo se fesoasoani.

Na atoa lelei lava le vaiaso na tea nei o taumafai le alii leoleo atoa ai ma lona toalua e faasufi le tusitala e ave i tua lana tagi ae ua lē maluelue lava lenei tamaitai.
Na ia ta‘ua sa iai lona manaoga e aveese ona o le alofa i le toalua o le leoleo ua tagi atu ma faapea atu e telē le aafiaga o le galuega a lona toalua i lenei mataupu auā e ono tuli ai ma lana galuega ae toalima o la alo o loo tau faaaooga.

Ta‘ua e lenei tamaitai e fai foi o le taumafai e saili se fesoasoani i lea po ae o le tele o faamatalaga ma tau faamata‘u a le alii leoleo ua tonu ai lava i lona manatu e tatau ona aoai le leoleo lenei, o se sinia i le galuega, e lē talafeagai ana amio na fai.
O le mataupu na amata ina ua sulu atu lenei tamaitai mo leoleo e agai i le fale na mautotogi ai e aumai i tua ana atopau ua taofia e le tamaitai e ana le fale na mautotogi ai. O le tala a le tamaitai o lea fale, ua lē atoa atu le totogiina o le rent a le tusitala.

Na finau lenei tamaitai ma faapea mai ua uma lelei lava ona totogi lana aitalafu i le fale mautotogi. E ui o lea o le agai atu i le ofisa o leoleo mo se fesoasoani na lau ai ma lona taufaavalea ma faafefe ai loa le loka o ia e le alii leoleo satini sinia.

Sa fai nei feaga a o iai lava leoleo o le ofisa ma na ta‘ua e lenei tamaitai, na mae‘a le mataupu ma le tamaitai e ana le fale mautotogi ae faapea atu loa le alii Satini Sinia, pe manao la te o i le po lea. Na fai i ai le tamaitai e leai. Sa toe faapea atu pe iai sana uo tama, ma alu atu le tali e leai.

Na ta‘ua e lenei tamaitai na faaauau ai lava faiga nei a le alii leoleo ina ua mae‘a le mataupu na sulufai atu i ai. Na oo lava i lona ofisa o agai atu ai telefoni a lenei alii ma faamata‘u le ave e loka i le taufaavalea pe afai e la te lē o e momoe.

“E fai o lo‘u mafatia i le tau saili o se isi nofoaga ou te faamautu ai ae o le faaopoopo mai o faiga nei a le leoleo,” o lana faamatalaga lea. O se tamaitai sa leoleo muamua lea na tapa sana fesoasoani i le ofisa o leoleo ma agai sa‘o ai loa i le vaega e suesuea amio a leoleo i le faatinoga o a latou galuega lea la na faapea ona faamauina ai loa le faaseā a le tusitala ma tuu atu ai loa ma le suesuega e faatino i le lotoifale o leoleo a o lei oo i le faamasinoga.

O lea foi la ua faapea ona maua le faaiuga lea ua faia e leoleo ua aveese ai ma le aumalaga lenei na fuafua mo puipuiga i atunuu mamao, ma ua malolo lelei lenei alii e tālia ai suesuega nei ua faia faasaga ia te ia.

Mo le tamaitai tusitala o lea ua sui le nofoaga e mautotogi ai ma ua faatalitali foi le oo o lenei mataupu i le faamasinoga.