Ua avea nei le alii fomai sinia, le afioga Lemalu Dr Limbo Fiu ma se tasi o ofisa sinia maualuga poo se Dean mo le Iunivesite faafomai i Samoa, le Oceania University of Medicines le OUM o loo i Motootua.
Faaalia i se pepa o faamatalaga mai le pulega o lea iunivesite, sa faia sailiga i le avanoa na faasalalau, ma e ui ina toatele i latou mai fafo sa talosaga ae na tasi moemoe lava le pulega e ave le galuega i le Afioga Lemalu Dr Limbo Fiu ona ua na o ia ua iai le agavaa e tauave ai lea tofiga maualuga o le iunivesite.
O le taimi nei o loo faauluulu i le alii fomai le vaega o auaunaga tau togafitiga i le maota gasegase o Tupua Tamasese Meaole i Motootua.
Ua tele tausaga o galue o ia i le tomai faafomai ma ua lava foi lona silafia i le galuega. E faailoa mai lea filifiliga a le iunivesite faafomai, ae o loo faatalitali se vaega o le aufaigaluega a le iunivesite i se faapupulaga atili o mafuaaga ua faamalolo ma faamuta ai a latou galuega pe a fono le komiti o le pulega i le masina fou.
O se alii fomai o se polofesa mai Initia ua aofia ai ia i latou ua faamuta le toe galulue ai i le iunivesite i Motootua.
O se tasi o mataupu o loo tele ina gugulu ai foi nisi o le mamalu o le atunuu, e pei ona sa iai tusitusiga i le vaiaso talu ai, ma o loo faia pea i ai ni faatalanoaga a i latou o loo i tulaga e iloiloina ai mataupu faapea.
