“O lea ole a toe faia suega masani poo National Exams a Aoga tulagalua ile vasega valu e sue uma ai mataupu”...Minisita o Aoga, Taaloga ma Aganuu

“O lea ole a toe faia suega masani poo National Exams a Aoga tulagalua ile vasega valu e sue uma ai mataupu”…Minisita o Aoga, Taaloga ma Aganuu

Ua lima tausaga talu ona lē toe faia ni suega mo fanau ale atunuu ua oo ile vasega tausaga valu poo le Form 2 sa iai i tausaga e tele ua tuanai.

Na suia ile suega ole SPECA sa sue ai le mafaufau ole tamaititi i lona iloa ile mataupu ole Gagana Peretania ma le numera lea sa lē toe togia ai ile poto ole tamaititi ile mataupu ae togi i lona iloa, ma sue ai lona mafaufau ile taimi atoa na aoga ai ile tulagalua.

Ua faailoa nei ele Minisita o Aoga Taaloga ma Aganuu le afioga Loau Solamalemalo Keneti Sio, ole a toe foi e fai le suega masani e sue ai mataupu uma e saili ai le poto ma le atamai i mataupu uma.

“Ua mafua ona toe foi e fai le suega ale Tausaga Valu le National Exam ona ua faaletonu lava fanau pe a oo ile vasega iva e faasolo atu i luga, ma ole toatele lava ua lē gafatia loa le faigata o mataupu ona solomuli loa lea ua lē toe fia aoga”.

Na faaalia foi ele Minisita ole isi lea o faafitauli tele ua molimauina ole toatele o fanau ua lē ausia le oo atu i vasega maualuluga i kolisi e saili ai avanoa e ulufale ile tausaga amata o aoaoga faaiunivesite.

Ole mafuaaga foi lea ua silasila ai le Matagaluega o Aoga Taaloga ma Aganuu, e saili ni auala lelei e mafai ai ona faaauau pea le olaga aoaoina o fanau ia mafai ona saili atu i isi avanoa e pei o aoga o matata eseese ile Iunivesite Aoao a Samoa pe afai ua lē mafai lava ona faaauau le aoga ile tulaga maualuga oloo manaomia i aoaoga ile Iunivesite ale atunuu.

“Ole tasi lea o taumafaiga ua liliu le matagaluega e faatino, ole saili mai o fanau na muta aoaoga ona oni faafitauli e pei ole ma‘ito ole tamaitai ona alu ai lava lea nofonofo ile fale ae sa lelei lona taumafai ile aoga”.

Ua toatele fanau ua toe agai nei e faaauau aoaoga ile tuanai oni tausaga o nonofo e le toe aooga ma ua fesoasoani ai nisi o polokalame ua ofo mai e aoga tumaoti a ekalesia ua iai a latou aoga mo le aoaoina o matata e pei ole suisui ma isi tomai e mafai ona saili ai ni galuega.

Ole taimi nei e pei ona faaalia ele Minisita le afioga Loau, oloo galulue lana matagaluega mo le faalauiloaina ile atunuu o avanoa nei ina ua mae‘a ona toe faia ni fetuunaiga poo reforms, e toe faatulaga ai le unaia o aoaoga mo fanau lalovaoa ale atunuu.

Ole taiala ua mae‘a faataoto nei ua ave ai le faamuamua ile unaia o mātua e ave fanau i Aoga Amata, ose isi lea laasaga na faaalia ele Minisita ua naunau le Malo e tapena lelei le olaga aoaoina o fanau a‘o laiti, auā ole faitotoa tāua lea i lo latou ulufale atu ile isi sitepu ole olaga aoaoina pe a oo i Aoga tulagalua.

Ua iai se fuafuaga ale Malo e aumai uma le pulega o Aoga Amata ile pulega ale Matagaluega o Aoga ise taimi ua lata mai, ma ose suiga ole a gafa ai loa le Malo ma le totogiina o faiaoga o Aoga Amata.

Ole taimi nei oloo pulea lava e ekalesia ma faalapotopotoga oloo faatuina Aoga Amata a latou faiaoga.

Comments

comments