O le talafaasolopito lava o le falepuipui i Tafaigata ma Vaiaata o nofoaga o le au nofosala poo pagota ua faamaonia solitulafono ma faia i ai faasalaga faafalepuipui. Peitai ua tatou iloa ma malamalama lelei o se nofoaga foi e ave i ai nai tagata ua ta‘ua o vale poo i latou e aafia i le gasegase o le mafaufau.
O le fuafuaga a le Malo e vavae ese le pulea o falepuipui i le atunuu mai le matagaluega o leoleo ua faatino nei e pei ona talanoaina i le vaiaso ua mavae i le Palemene le tulafono tau faaofi e faatū ai se matagaluega fou a le malo e nafa ma lea tulaga.
O se fuafuaga ua talia atoatoa e le Palemene peitai o loo iai fautuaga ua taoto atu nei i le Minisita o leoleo ma falepuipui ma le Malo e silasila toto‘a i ai, ina ia mafai ona faaleleia falepuipui i se tulaga e taofia ai faitioga mai fafo aemaise le malo o Amerika o loo ilitata i ana lipoti faaletausaga i le tulaga o loo iai potu o pagota ma meaai mo le au nofosala.
O le finagalo o le tasi o faipule o nofoa e lua o le Vaimauga i Sisifo i le Palemene le tofa Lefau Harry Schuster ina ua saunoa i le tulafono taufaaofi ua ao i se pulega fou o le a tulai mai ona silasila i nai tagata e aafia i le gasegase o le mafaufau, ona o le mea o loo iai nei, a iai se tagata faapea e molia i ni uiga lē talafeagai i ni nofoaga faitele, e tasi lava le nofoaga e silasila i ai le faamasinoga o le falepuipui.
Peitai na saunoa le faipule e tatau ona iai se nofoaga lelei e tuu i ai nei tagata auā e lē fetaui ma talafeagai le toese mo i latou.
E lē o toe iai se nofoaga i le falemai tele o Tupua Tamasese Meaole, mo i latou e pei ona saunoa Lefau, ma o se isi lea tulaga ua ao i le malo ona tagai i ai. O nisi o faipule sa maua le avanoa i le tulafono taufaaofi sa latou laga le tatau i se pulega fou o falepuipui ona silasila i le itu i potu o loo faamautu ai pagota, ona e lē o lelei i le tulaga o le soifua maloloina aemaise foi o meaai e tatau ona faaleleia.
Saunoa le faipule o Sagaga Le Usoga le afioga Muagututagata Peter Ah Him, o le mea moni lava, o le falepuipui e lē o se faletalimalo ia iila ma felesi mea uma, ae tatau lava ona faagaioi i se tulaga e lagona ai e le tagata solitulafono le leaga o se mea ua ia faia na mafua ai ona alu i le falepuipui.
O le faipule o nofoa e lua o le Itumalo o Falealili, le tofa Tusa Misi Tupuola o lana fautuaga foi lea ae sa ia faamanatu i le Minisita, e tatau foi ona silasila i ituaiga o tagata o loo nofosala e pei o faafafine, pe lē tatau ona ese se nofoaga o le falepuipui e tuli ai o latou faasalaga, ona e iai mea ua tutupu mai i le falepuipui. Na faaalia e se tasi o faipule, o se manatu tāua tele ae ia silasila lava foi i se nofoaga mo tamaitai amio faatama pe lē tatau foi la ona lē tuua faatasi i le falepuipui o tamaitai.
