Ose gasegase ole ate poo le liver ma se gasegase ole fatu ua muamua ave e togafiti e fomai i Initia ma o uluai gasegase nei mai Samoa ua ave ise finagalo ole Malo, ona ole saunoaga ale Faatonu Sili Aoao le tofa Lusausa Dr Take Naseri e sili ona taugofie.
“E ui e faapea e mamao pe a fua ile va o tatou ma Niu Sila ae sili atu ona taugofie”, ole finagalo lea ole Faatonu sili Aoao ole Soifua Maloloina. Na lagolagoina ele taitai ole Malo le finagalo lea ole Faatonu sili Aoao auā na faailoa ele Palemia i tusitala, e faaluaina le taugata o Niu Sila pe a ave iai se gasegase nai lo le tau ua ofo mai ele Malo o Initia e togafiti ai gasegase faigata e le maua i Samoa ni togafitiga.
Faaalia ele Palemia susuga Tuilaepa L Sailele Malielegaoi, e toetoe lava oo ile $20 miliona tala Samoa e faaalu ile tausaga i gasegase oloo ave e togafiti ma faia taotoga i Niu Sila. “Ose fesoasoani maoae lea ua tatou maua mai Initia, ma e mafai ele totogi ole gasegase e tasi ona ave ai ma le tagata ole aiga e vaaia le ma‘i faapea ma le tau ole faletalimalo e faamautu ai”. E lei mafai ele Faatonu sili ma le Palemia ona faailoa fuainumera ole tau ua ofo mai e Initia e mafai ai ona faatusatusa le totogi ole ave i Niu Sila. Peitai na faaalia ele Faatonu sili Aoao ole Soifua Maloloina, oloo silasila foi le Malo e aumai fomai mai Initia e faia togafiti ma taotoga o gasegase i Samoa.
Ose faiga lelei lea e mafai ai ona a‘oa‘oina ma fomai oloo galulue ile maota gasegase o Tupua Tamasese Meaole. “Ole isi lena itu lelei ole fuafuaga fou lea ua amata ona faatalanoa auā a malaga mai fomai popoto ole atunuu lea e mafai ai e tatou fomai ona maua le poto a‘oa‘oina e le o mafai ona maua ile taimi nei”, ole finagalo lea ole Palemia.
Na fesiligia le Faatonu sili le susuga Leausa Dr Take Naseri pe o lona uiga ole a lē toe avea ni gasegase i Niu Sila, ae o lana saunoaga mai e le faapea ole a tuua le ave i Niu Sila, ae fuafua ise gasegase ua maaleale tele ona auga ma e le gafatia le mamao ole malaga i Initia ona silasila lea e ave i Niu Sila e latalata mai i Samoa.
Ole a toe tuliloaina pea le Malo ile fuafuaga lenei ina ia maua atoa le taotoga o lenei faamoemoe ole Malo.
