O se tasi o aiga ua toafā i ai aiga ua tautino i faiga lē manuia a le faifeau e pei ona sa lipoti atu i le tolu vaiaso sosoo o a tatou lomiga, na ta‘ua le fiu e toe tauanau tusi folau sa aveina e le faifeau mo le talosagaina o pepa nofomau.
O le taumafai o lea aiga ina ia toe faafoi ane a latou meatotino, sa taulimaina e lē o loo tuuaia, peitai ua lē mafai lava, sa iu ai ina sulufai loa i leoleo mo se fesoasoani.
E lei iai se isi mea na toe mafai pe ono lafi ai le faifeau ina ua taunuu i ai le faafitafita a le ofisa, ma faamatuu ane ai loa meatotino a i latou sa mafatia ma nofo pologa i faiga piopio ma le lē faamaoni a lea lava auauna.
E lei taga tasi gaioiga a le faifeau, ae ua lē iloga se matata e agai i ai, talu ai le fia fesoasoani e ala i ni faiga faaalatua ma le pepelo.
O le leai o se galuega sa faia, ae ua na o le tapa o tupe ma le faia o faamatalaga tau‘ole‘ole i tagata, na mafua ai ona musu e toe faafoi ane tusi folau.
Na mautinoa e aiga e leai se gaioiga a le faifeau o faia mo talosaga agai i le ofisa o femalagaiga, lea na manaomia ai le toe faafoi filemu ane o meatotino, ae ua avea ma mafuaaga o le lafi ma le teena e lana susuga.
O le taunuu ai o le tagi a se tasi o aiga i le ofisa o leoleo, ua avea ma auala sa toe mauaina ai e leoleo le faila o le faifeau lava lea, sa faapea ona latou osofaia muamua i le mataupu o tusi folau.
E manatu o se fafagu tāua tele lea i le ofisa e manatua ai, ma iloa ai le vaavaa ma le ituaiga tagata e iai le faifeau lea.
Ae o nisi foi o lipoti ma molimau, sa ta‘ua ai o le mafuaaga tonu lava lea na toe siitia mai ai le aiga lenei mai Ueligitone sa nonofo muamua ai.
O faiga lava faapea sa faia a o iai i le laumua, ma na oo ina saili e le toatele o tagata sa totogi i ai tupe, na mafua ai loa le agai mai i Aukilani. Atonu sa iai lona manatu e faaauau ai ona faia pea lea faiga leaga ma le lē faamaoni, ae galo ai e leai se isi e lafi pe sola i luma o le silafaga paia a le Atua.
O le fa ai lenei o vaiaso o loo lipotia pea nisi o faamatalaga ma faamaumauga mai le toatele o aiga sa aafia i faiga tau faasese ma faiga piopio a le susuga ia Pio Leaia, e pei ona tagai ane i ai i vaiaso ua tuanai.
O faiga e aofia ai le tapa o tupe a tagata sa ia faia ma o loo ia faia pea talosaga mo pepa nofomau agai i le Matagaluega o Femalagaiga a Niu Sila. E lē gata i lea, a o lona faaaogāina o stamp a le Ekalesia Aoao e faasese ai le ofisa o lafoga, ma faamatuu ane ai lafoga toe faafoi (rebate) a le toatele o le mamalu o le atunuu.
O le vaiaso talu ai, sa ta‘ua ai foi e nisi o molimau maumaututu sa vaai tino i nisi foi o faiga a lea lava auauna.
Sa ta‘ua e faapea, sa faaaogāina foi e le susuga i le faifeau faamau faailoga poo stamp a le isi ekalesia mo le talosagaina o tupe mai le ofisa o lafoga i tausaga ua mavae. O lona uiga e foliga mai ua fai si leva ona fai gaioiga faalēmata‘u a lenei auauna, e lē gata i le va ma tagata lautele, ae faapea foi le va ma ekalesia tetele e pei ona ta‘ua.
Ou te manatu o le a lē āfaina i taitai ma toeaiina o ekalesia le aafia o igoa i le tusitusiga. O le ekalesia PIC Samoa o loo iai i lalo le aulotu a le susuga i le faifeau, a o le EFKS, lea sa ta‘ua e molimau, sa taulimaina foi e Pio Leaia le latou stamp sa ia faaaogāina i ni faiga faasolitulafono. O ni faiga sa ta‘ua e le molimau, sa faaaogā saili tupe ai ma faatupe ai nisi o ana faiga malaga i fafo ma toe foi mai.
O vaega uma ia o loo tuua‘ia ai le faifeau, ma sa molimauina e aiga sa talanoa i ai le Samoa Times ina ua suesueina le mea moni, a o lei lomia i luga o le nuispepa. E matuā tele ma anoanoai le mau faamatalaga ma faamaoniga mai le mamalu o le atunuu, ona o mea moni lava sa tutupu i tagata o o latou aiga, ma o nisi ua toe taliu i Samoa ona e leai se talosaga mo nofomau sa faauluina, ae ua gotouga ai lava seleni i le susuga i le faifeau.
O se tasi o aiga e faapea na savali i le lua tausaga, o pepelo lava e Pio ma fai i ai ua mae‘a ona toe faafou le pemita asiasi, ae matuā pogisa lea aiga, e lē mafai ona toe faafou se pemita asiasi pe a mae‘a le taimi faatulagaina e tasi le tausaga e nofo ai i totonu o Niu Sila. Sa talitonu pea sia aiga, ona sa manatu o le faifeau lea e faamoemoe i ai, ma e lē mafai foi ona pepelo le faifeau.
O le suesuega lava a le Samoa Times, ma tau tuufaatasia faamatalaga ina ia manino pea lau faitau, sa maua ai e faapea e iai isi pisinisi a le faifeau o loo faagaioia e oo mai lava i le taimi nei. E manatu nisi masalo o le mafuaaga lea o le finau atili ma le tuinanau pea o le susuga i le faifeau i le tulaga tau seleni, ona o le tau faapaleniina o tupe gau, ma tupe alu sese ona o le tele o le mau pisinisi o loo fai.
O le vaiaso lava na tea nei na maua ane ai se faaaliga a leoleo ma fesiligia ai le aiga o loo ua faato‘ai le faaseā faasaga i le faifeau, poo fea tonu e fai ai le lotu a le susuga ia Pio eaia. Ua mae‘a ona faailoa i ai le nofoaga, ma o le ata manino lea e faailoa mai ai e lē o toe mamao, ae faataunuu loa nisi o tiute o leoleo mo le taofia o lea auauna mo ni suesuega.
Na pau le tulaga e faamoemoe ai ona sa lipotia foi e le aiga lea, se tulaga lē manuia sa faia e le fanau a le faifeau, i lana fanau ina ua fetaui i se tasi o nofoaga faitele. Na faailoa e le tamā ia Tago lona faanoanoa tele i lea tulaga, ona e foliga mai o le a āfaina ai fua fanau ae o le agasala e fasino i le tamā o le aiga, aemaise ai o le lafo o upu mamafa i tamaiti i nofoaga faitele.
