Ole taualuga masani o polokalame ole Teuila i tausaga taitasi, ole sailia ose Tausala o Samoa. Ole vaiaso lenei ua faagasolo ai polokalame ole Teuila ole 2017 lea ole a maea aloaia ile po ole Aso Toonai nei ile tauvaga e saili ai se tausala ole atunuu mai tamaitai lalelei e toaiva e aofia ai tausala e toatolu mai Ausetalia, toatasi mai Niu Sila ae toalima mai Samoa.
Ole faaiuga ole vaiaso ua tuanai atu nei na maua ai se avanoa le aumaua o tausala e feiloai ai ma le taitai ole Malo ile Palemia susuga Tuilaepa L Sailele Malielegaoi. ose feiloaiga na mafai ona fesili ai nisi o tausala ile Palemia ma faasoa atu iai le taitai ole Malo ma le atunuu. Ose feiloaiga na tapenaina ele Samoa Events Incorporated poo le SEI oloo tapenaina le tauvaga.
Ole faamoemoe autu o lea feiloaiga e pei ona faailoa mai ese sui ole SEI ole tapena lea ole lotoifale o tamaitai ia silafia tulaga oloo faafoe ai le Malo ile tulaga i ana atinae oloo faatino, ole itu ile tuputupu ole tamaoaiga ole atunuu aemaise o luitau. Ole isi itu taua ole feiloaiga ole tapena o tausala taitasi pe a manumalo se toatasi oi latou, ole tauvaga tele ole sailia ose tausala ole Pasefika. O Fiti ole a faia ai lea tauvaga ise taimi ole tausaga nei 2017. Ose feiloaiga e tumu i tala mālie ale alii Palemia na maua ai le ata ma le fiafia o tamaitai tauva.
Na faaalia na avea le feiloaiga lenei ma avanoa ua silafia lelei ai e tausala tauva uiga mālie ma le ituaiga tagata e iai le taitai ole Malo aemaise lava ina ua oo tala ole feiloaiga ile mataupu ile tulaga tutusa o alii ma tamaitai ile tulaga i tomai tau galuega ma tulaga i tofiga i totonu ole Malo, o tekonolosi, le siitia ole numera o tamaitai ile Palemene o Samoa, ma le tuuitiitia o vailaau mo togafitiga o gasegase. Na oo lava se tasi o fesili a se isi tausala ile alii Palemia pe aisea nate le lagolagoina ai aiga fuafuaina poo family palnning.
Ole tali a Tuilaepa ile fesili na ia saunoa ai o taimi uma e faia’ina ai le Manu Samoa e nate tuuaia le laititi ole faitau aofai o tagata i Samoa e nao le 180 afe ona ole toaitiiti o fanau a ulugalii, ae a silasila ia Fiti ua silia ile tasi le miliona lona faitau aofai ma ole mafuaaga lea ole toatele o alii talavou lelei e fili ai lana aulakapi taitoafitu. I lona tulaga ole taitaifono ole Iuni Lakapi e le manao e faia’ina soo le Manu Samoa e pei foi ole tapuaiga ale atunuu lautele.
O lana saunoaga i tamaitai tausala ana le i totonu ole iuni lakapi ale atunuu ile sefulu tausaga talu ai e le oo mai nei o iai pea le aulakapi ale Manu Samoa ma le aulakapi taitoafitu, ina ua solomuli ese le alii pilionea o Sir Michael Faye sa sasaa atu ana miliona ma miliona e lagolago ai le Manu Samoa.
