Ua tele aso faamanatu ma o se tasi lenei o aso ua faamanatuina i lenei masina, o i latou e iai manaoga faapitoa. E tele polokalame ua faatautaia ona o lenei aso tāua ma le taulai lava ia maua e tagata ua ta‘ua o le mamalu o le atunuu e iai manaoga faapitoa avanoa tutusa i aoaoga ma galuega.
O le fesoasoani na ofo atu e le Faletusi a Samoa le Samoa Stationery and Books (SSAB) na fai uma ai faailoga o i latou o loo aoaoina i le Loto Taumafai, le nofoaga tutotonu o aoaoga mo le fanau e iai manaoga faapitoa.
O le laugatogi atoa lava lea ua maua mai faailoga i lea kamupani ma na ta‘ua e le tamaitai ia Fiti Leung Wai o se auala ua mafai ona ofo atu ai le lagolago a lenei kamupani e saga faamalosi i le fanau e iai manaoga faapitoa e galulue faaauau mo le atinae o aoaoga.
O le isi lagolago ua ave ona o le itu lea o se aoga lenei e faamoemoe lava i le maau o le atunuu auā lona faatamoega.
O se faafetai na saunoa i ai le alii o loo faauluulu i ai le aoga a le Loto Taumafai i lenei vaitaimi, le Afioga Letaa Dan Devoe ona o lenei fesoasoani ua maua mai i le SSAB. E to‘a 171 i latou o loo aoaoina i le Loto Taumafai mai i le 5 tausaga le matua seia oo atu i le tupulaga talavou ia ua aoaoina i matata eseese.
O le vaiaso fou faailoga taualoa mo alii ma tamaitai o loo galulue i ofisa eseese o le atunuu ma isi fale faigaluega ma o le latou sao i ia auaunaga ua faapea ona amanaia i lenei aso tāua ma o le Nuanua o le Alofa, le faalapotopotoga ua unaia atinae tau galuega ma avanoa tutusa o ē e iai manaoga faapitoa ua faatautaia lenei taumafaiga lea e faamoemoe e faagasolo i tausaga taitasi.
O lea ua faamautu mai foi le lagolago a le Malo e ala i le fausia o le fale fou o le Loto Taumafai, lea ua faamatuu mai ai le fanua o le Malo i Vaitele ma o faiga faapaaga a le Malo o Samoa atoa ai le Malo o Saina ua mafai ai ona faatino lea galuega tele lea ua fuafua mo le tausaga fou.
O le galuega lenei ua aofia ai se faleaoga mo le fanau laiti atoa ai se nofoaga mo aoaoga o matata eseese mo le tupulaga matutua aemaise o se falemai auā taimi e ono moomia ai e fanau togafitiga ma suesuega.
