Ole faalavelave i Falelauniu ile vaiaso ua mavae ua faamauina e leoleo ole faalavelave matuia lea ole savaliga ua amata o lenei tausaga 2017.
Ose faalavelave ua gugulu ai lagona ole toatele ma tusitusilima ile mafutaga a mātua ma fanau ma le tele o faalapotopotoga oloo feagai ma galuega tala‘i oloo laugaina ai le tāua ole pitolaau a mātua ile vaaia o fanau aemaise o latou aiātatau ua malupuipuia ile feagaiga o aiātatau faavaomalo mo aiātatau ole fanau ua afifi ma talia e Samoa.
Ole tamaitiiti 14 tausaga le matua ua fano lona ola ile gaioiga ua faamatalaina e leoleo na umia ai e lona tamā se agaese ma faaoo ai manu‘a i lona atalii e pei ona faaalia ele sooupu ole Matagaluega o Leoleo ile feiloaiga ma tusitala ile Aso Tofi ua mavae, e faapea na maliu le tamaititi ona ose pu se‘i tulou le aufaitau, ile itu taumatau o lona ua.
Ole tamaloa e pei ona faailoa e leoleo sa fai se inugapia ma nisi taulelea ma na tulai mai ai loa ma le faalavelave ina ua tuli ele tamaloa lona toalua e lē maua, liliu atu loa tuli lona atalii ma faatino iai se gaioiga na faaaogā ai le agaese e faapea mai le sooupu o leoleo ose sapelu.
“Na sulu atu lava si tamaititi ise tasi o aiga ma tau valaau, o lona tamā ua na faaoo le manu‘a ia te ia”.
Ole saunoaga lea ale sooupu le susuga Su‘a Muliaga Tiumalu ma ia faaalia e lē o iloa tonu le mafuaaga ole toatamai ole tamaloa i lona atalii ma le mafuaaga na fai ai tuliga ma lona toalua.
Ole taimi nei oloo ile vaaiga a leoleo le tamā e 47 tausaga le matua o lona soifua mo le puipuiga o lona saogalemu ma nisi suesuega a leoleo ae ua molia nei ile fasioti tagata faamoemoeina.
“O fanau lava ia ole pitolaau lea a mātua ole faatonutonu ae a oo loa ina oso a‘e le ita ae ua lē mafai ona taofiofi ona oo lea ise tulaga ua soli ai ma le tulafono”.
Ole finagalo lea ose faauluuluga ose tasi o faalapotopotoga i Samoa oloo nafa ma ni polokalame oloo fesoasoani ai i nisi o mātua ua aafia i soligatulafono ona ole lē mafai ona pulea le loto ile taimi e oso a‘e ai le ita.
Ole Toomaga mo ē Puapuagatia oloo ave iai ele faamasinoga nisi o mātua e tulai ile faamasinoga ona ua oo le lima ole tina poo le tamā ise tasi ole fanau, poo le oo foi ole lima ole tamaloa ile tina ole aiga.
Ole faalavelave i Falelauniu ua faaalia ese sui o lea faalapotopotoga ua lagona ai le ootia ole loto ile alofa ile atalii ua maliu. E iai foi nisi o fanau e aafia ini sauaga ole tino ona ole sasa a mātua oloo vaaia ele Toomaga.
Ile tamā ua molia e leoleo ona ole uma ole ola o lona atalii ole Aso Gafua a sau 27 o Fepuari 2017 ole a tulai ai ile faamasinoga maualuga mo le taimi muamua.
Oloo talosagaina e leoleo le pule o maliu mo se taotoga e faamautu tonu ai manu‘a ole atalii ua maliu ma le mafuaaga tonu ole uma o lona ola.
