O le masina na tea nei na aumai ai le faaiuga a le Faamasinoga Maualuga i Samoa ia toe faaauau tiute faaloia o le Afioga Tuala Joe Ponifasio, ae faataatia ese pea le faaiuga a le sosaiete a loia, lea sa faamaonia le moliaga e tasi o le alii loia ma faamalolo lē tumau lona tusi e faatino ai ona tiute faaloia.
O le toe faaauau ai o ona tiute faaloia, sa faapea ona feiloai ai le sosaiete a loia i Samoa ma talanoaina le faaiuga a le faamasinoga o talosaga apili na fofogaina i le faaiuga o le tausaga ua mavae.
O lea faaiuga na poloaina ai le faataatia ese o le iuga a le faamasinoga poo le Tribunal a le sosaiete lea na faamaonia ai le tuua‘iga e tasi faasaga i le alii loia, ma faamalolo mai ona tiute faaloia mo le lua tausaga.
Peitai o lea faaiuga na toe apili e Tuala i le faamasinoga maualuga, ma aumai ai le iuga ua faalēaogāina ae faaauau pea le faaiuga ua faia e le faamasinoga a le sosaiete.
Na toe apili e Tuala le mataupu i le faamasinoga apili ma faia ai loa le iuga e faataatia ese le iuga a le sosaiete, ona e lagolagoina e le faamasinoga o talosaga apili le finauga a le alii loia, e leai se paleni o le faaiuga ma le toe saofafai o nisi o sui o le sosaiete sa faia le faaiuga e molia o ia, i le laulau na suesueina ona moliaga.
O le faaiuga o le vaiaso na tea nei na fono ai le sosaiete a loia ma talanoaina le mataupu ma maua ai le latou faaiuga autasi, ia toe tuuina atu moliaga o le alii loia e suesueina e se laulau o loia o sui o le sosaiete.
Faaalia e le Pelesetene o le sosaiete, le afioga Leota Raymond Schuster, i se lipoti a le upega tafailagi o le Talamua, e lei iloa tonu se aso e faia ai le faamasinoga ona o loo fua i taimi avanoa o sui o le sosaiete ua filifilia i le laulau o le a toe tagofia moliaga o Tuala.
Na faaala ai foi e le pelesetene o loo manino le faaiuga a le faamasinoga o talosaga apili ua na o le vaega lava i sui o le sosaiete na suesueina muamua le mataupu e lei paleni ma atoatoa lo latou tulaga tutoatasi, ae o le faaiuga na latou faia e lē o aafia.
O le mafuaaga foi lea ua toe tofia ai se isi laulau e suesueina le moliaga o Tuala, lea sa tuua‘ia ai i lona faaaogā i se auala lē talafeagai o ni seleni a se tagata sa avea ai o ia (Tuala) na ana loia.
E lē o popole Tuala Iosefo Ponifasio
E lē o iai se agaga o le alii loia le afioga ia Tuala Iosefo Ponifasio, e faaletagata pe personal le mataupu o loo finau ai nei ma le sosaiete a loia i Samoa e pei ona manatu ai nisi o ana paaga i le galuega.
I se finagalo o le alii loia ua lipotia i se tasi o nusipepa i Samoa, o loo faaalia ai e Tuala o upu ua lafo e le sosaiete ia te ia e pei o lona lē faamaoni, amio ta‘uvalea, sa faapea ona mamafa ia te ia i le lua tausaga ua mavae.
O le faaiuga a le sosaiete ua faailoa e le peresetene o le a toe faaulu ai moliaga faasaga ia te ia, na saunoa Tuala i lea nusipepa, o le faitalia lava lea o le sosaiete latou, peitai o lana tuualalo i le sosaiete, e lelei a ma tatau ona faia e tusa ai ma taiala o le tulafono ina ia faamalieina itu uma e aafia.
O loo fautuaina e Tuala Iosefo Ponifasio le peresetene o le sosaiete a loia, le afioga Leota Raymond Schuster, e faatali le faaiuga tusitusia a le Faamasinoga Maualuga na faataatia ese ai le latou poloaiga lē tumau e faaauau le faamaloloina o ona tofi faaloia se‘i mae‘a ona toe fofogaina ona moliaga.
O lea mau a le alii loia, e faasino atu i se finagalo o le peresetene e faapea o loo sauni e apili le faaiuga a le faamasino sili na poloaina ai le toe ave o tusi faamaonia e faaauau ona galue faaloia.
O le iuga tusitusia e pei ona faaalia e Tuala, o loo iai le manino atoatoa ona toe mafaufau atili ai lea o le sosaiete pe tatau ona faaauau le latou talosaga apili.
