Ausia e Samoa se falemai fou e fau ai vae ma lima faapipii

O le fā miliona ma le iva selau afe e lē o se tupe itiiti ua fausia ai le falemai fou o le a avea ma toomaga o i latou ua taitasi aao (lima ma vae) poo ua motusi foi ni tamai lima. O le nofoaga lea o le a toe fau ai ni lima ma ni vae faapipii e toe maua ai le malosi atoatoa ma faaauau ai galuega masani ma isi tiute.

O se tautinoga lea mai le Malo o le a avea ma fesoasoani tāua mo tagata ua faaletonu nisi vaega o o latou tino aemaise lava i aao. O le a maua ai foi ma togafitiga mo tagata ua faaletonu o latou tino ona ua aafia o latou maeaalio poo spinal cord.

O le saoasaoa o le gasegase o le suka ua faapena ona aveese ai vae ma lima o nisi aemaise o tamatamaivae ma tamatamailima, o lea ua maua le laveai o i latou pe a oo ina lē atoatoa le malosi o le tino ona o lea gasegase faigata tele.

Ua faafetaia ai le Malo o Niu Sila ma Ausetalia faapea le Faletupe o le Lalolagi auā o i latou ua faatupeina lea auaunaga fou. O le tausaga e 1977 na muta mai ai se auaunaga foi faapea, lea sa avea ma galuega a nisi ua aafia i le gasegase o le lepela, o le fau o tootoo, o vae ma lima faapipii.

Peitai o se suiga tele i le auaunaga fou ona ua iai masini faaonaponei o le a faaaogā mo lea galuega. Faaalia e le Palemia o le a sili atu ona lelei ma maua ai e tagata o le atunuu se fiafiaga i le toe atoatoa o ona aao, ma mafai ona toe agai ai e faia galuega masani. 

O le molimau a le taitai o le Malo e lē tatau ona toe ta‘ua i latou nei o nisi ua lē atoatoa le malosi o le tino, auā o le a mafai ona toe agai e galulue i le faatoaga pe galulue foi i isi galuega ma toe maua ai le fesoasoani lelei tau tamaoaiga mo o latou aiga aemaise o le tausiga o fanau.

E faaataata a lafoga le saunoaga a le Pule o le vaega o auaunaga a le soifua maloloina le afioga Leota Laki Sio, o le a mafai nei ona toe tofu ma le oso to tiapula nisi sa lē atoatoa o latou lima ma agai loa e toe totō maumaga, ae o se tala moni.

O totonu o le nofoaga ua matuā lava tapena mo lenei galuega ma e lei faapipiiina masini. O nisi mai fafo ua aoaoina i le tomai e fausia ai vae ma lima faapipii o le a galulue ma nisi o alo o le atunuu, ona maua ai lea o le tomai ma le poto aoaoina e latou te faaauau ai lenei tautua aogā ma tāua mo o tatou tagata.

Se vaaiga i le nofoaga ua iai se auaunaga fou faaonaponei a le Matagaluega o le Soifua Maloloina, o le a fausia ai vae ma lima faapii Se vaaiga lea i nisi sa faaletonu aao, ae ua toe atoatoa le tino ina ua maua vae ma lima  faapipii