Ose mataupu na tulai mai i totonu ole ekalesia PIC Avondale na mafua ai ona va le fogatia ma vaeluaina ai le ekalesia. O lenei feeseeseaiga na oo i luma ole faamasinoga, ina ia sailia ai poo le ā tonu le Tulaga Aloaia poo le Identity ole ekalesia i Avondale, lea sa uluai galue ai le toeaina ia Leaosiitia ua tuumalo, sosoo mai ai ma le susuga ile faafeagaiga ia Asora ma le Faletua oloo galulue ai ile taimi nei.
O itu e lua ole mataupu ile faamasinoga, ole Itu tagi ole PIC Avondale, oloo iai le susuga ile Faafeagaiga ia Asora ma se vaega ole ekalesia oloo lagolago iai, ae ole Itu tetee ole AUP, poo le Avondale Union Parish o nisi lava ole ekalesia ua vaeluaina.
Ise faamatalaga mai le sui sooupu ole AUP na ta‘ua ai, mai le amataga e tasi lava le ekalesia i Avondale, na ole AUP peitai, e lua ona vaega ole SSF poo le Samoa Speaking Fellowship ma le ESF poo le English Speaking Fellowship.
Ole ESF e faafoe a latou tapuaiga ile gagana Peretania, ae ole SSF e faafoe a latou sauniga ile gagana Samoa. Na ta‘ua foi ele sooupu, ole AUP oloo i lalo ole faamalu ale Perepereane, peitai, ole mafuaaga na faaaogā ai le igoa ole PIC, ona ole finagalo ole faifeau sa tausia le ekalesia i lena vaitaimi, a‘o tuufaatasi taaloga a autalavou a ekalesia eseese.
Na manao ai le faifeau e faaaogā ele latou aulotu Samoa poo le SSF, le igoa PIC e tausinio ai i taaloga nei a autalavou, ona ole igoa SSF e tutusa ma le igoa ole apaeleni foi lea sa maua i Samoa i aso la, ole SSF. O lona uiga ole PIC ua na ose igoa e faaaogā, ae ole ekalesia lava latou ole AUP, lea e aofia ai le SSF ma le ESF.
Ina ua tulai mai le mataupu e pei ona feeseeseai ai le ekalesia ma vaeluaina, na agai ai e saili poo le ā tonu le Tulaga Aloaia ole ekalesia i Avondale, ona e peiseai, ua avea le PIC ma ekalesia resitalaina ae e lē ole tulaga moni lea ile talitonuga ose vaega ole Ekalesia.
Ole aso 21 o Oketopa na taulimaina ai le iuga tusitusia ale faamasinoga e tusa ai ole finauga a itu e lua. Ole iuga ale faamasinoga oloo tuuina mai, ole lotu oloo iai i Nafanua i Avondale ole AUP, e tasi lava le lotu ae lua ona itu, ole itu ile gagana Samoa (SSF) ma le itu ile gagana Peretania (ESF).
Ua talia foi ele famasinoga le talosaga ale AUP ina ia o ese loa ma le lotu le itu ale PIC ma ua faapea foi ona faatonuina le PIC latou te totogiina uma tau ole faamasinoga. Na ta‘ua foi ele sui sooupu ale AUP, ua talia foi ele faamasinoga le latou talosaga ina ia toe faafoi uma atu meatotino ale AUP oloo umia ele PIC, faatasi ai ma meatotino ua toesea pe faaleagaina foi.
Ise feiloaiga ma le loia oloo tulai mo le PIC na ia ta‘ua ai, ua tapena le latou pito e toe apili le iuga ale faamasinoga.
