O le faafitauli o le toagaogao o le auaunaga a tausi soifua ma fomai e le fuatasi ise atunuu e pei o Samoa. O le isi lua tausaga o lumanai o le a fesoasoani ai le Malo o Saina i le toagaogao o lea auaunaga taua i le atunuu, aua o le a auauai ona malaga mai ni vaega o fomai a lea atunuu e galulue i le Matagaluega o le soifua maloloina.
E le gata o fomai i auaunaga eseese mo le vaaia ma le togafitia o gasegase ae o le a mafai foi ona maua ai le avanoa e tufa le tomai o fomai mai Saina i fomai i Samoa aemaise foi o le aoaoina o alo ma fanau a le atunuu o loo iai lea tomai faapitoa.
O le Aso Faraile ua mavae na sainia ai le maliega i le va o le sui o le Malo o Saina i Samoa ma le Minisita o le Soifua Maloloina e faamautu ai lea laasaga o le a faatino e le Malo o Saina o le aumai o nisi o fomai ma nisi e iai tomai i galuega tau soifua maloloina e galulue i Samoa.
Faaalia e le Minisita o le soifua maloloina le afioga Tuitama Talalelei Tuitama, o le sainia o le maliega mo lea fesoasoani o se faamama avega lea i le galuega fita o loo feagai ma fomai ma tausi soifua i aso taitasi. O le itu sili ona faafiafiaina ai le alii minisita o fomai faapitoa i nisi o togafitiga o le aofia iai latou mai Saina o le a galulue i Samoa. O lona uiga o gasegase sa ave i fafo ona e lē o iai se fomai i Samoa e mafai ona suesueina sona gasegase o le a mafai ona faatino i le atunuu.
O le a faasao ai nisi tupe alu a le matagaluega mai le togafiti i Niu Sila ma Initia o nisi o gasegase faigata. O ni tausaga ua mavae a’o avea le tofa Mulitalo Siafausa ma minisita o le soifua maloloina sa iai foi ni fomai mai Saina ma Initia sa galulue i le matagaluega o le soifua maloloina.
O se fesoasoani taua peitai sa iai ni faafitauli sa tulai mai ai o le faigata i nisi o fomai Saina ona tautatala i le faapeletania ma sa iai se faaliliu upu sa fesoasoani i lea tulaga. Na aliali ai foi lagona lagomia o nisi o le atunuu ona o le faigata ona fesootai i ia fomai sei vagana o se faaliliu upu.
O le agalelei pea o le Malo o Saina i a Samoa ua le gata o ana fesoasoani ua fausia ai nisi o fale tetele, o fale faatali vaa ma faaee pasese i Faleolo, ae o lea foi ua toe tatala mai le agalelei o Saina e ala i fomai.
