Aumai e Ioane Viliamu le malaga a le Fiji Airways mai Melepone i Samoa

Na mālie le saunoaga a le afioga i le alii Pule o Fefaatauaiga i Ausetalia a le Kamupani Vaalele a le Fiji Airways, ina ua ia faamatala lona suafa atoa, o Peseta John William Nickel, ma ia saunoa ai, na momoli atu e Ioane Viliamu le tala lelei i Samoa, ae o lona igoa Samoa o Ioane Viliamu lea ua sau e aumai le tala manaia mo Melepone, e ala lea i le malaga faapitoa a le kamupani vaalele mai Melepone e agai i Samoa ae malolo i Fiti mo na o le tasi le itula i po o Aso Gafua taitasi, ona toe taliu mai lea i le po o le Aso Lua mai Samoa malolo i Fiti i le itula foi e tasi ma malaga tuusa‘o mai ai loa mo Melepone.
O se tala fiafia, manaia ma tāua tele mo le paia ma le mamalu o alala ma papaaao i Melepone, ona o malaga televave sa iai, e malaga i isi aai e pei o Sini ma Perisipeni ona faatoa malaga tuusa‘o ai lea i Samoa, ae o le toatele lava e malaga i Aukilani malaga ai i Samoa.
E pei ona silafia, o fesootaiga o malaga a vaa e tele ina umi taimi faatali, ae o le tele foi o feuiuiaiga. Peitai o lenei ua to‘ia le laulau a Tumua i le faaaloalo ma le silasila a le afioga a Peseta, o le a faigofie ma televave ai malaga mai Melepone mo Samoa ma toe foi mai.
Faafetai i lenei tamalii iloga o le atunuu, ona o le silasila alofa ma le faaeaea mo ona tagatānuu e pei ona ia saunoa, e fesiligia lava ia e Fiti pe aisea e tapisa soo ai mo Samoa, o lana tali, o ia o le Samoa moni.
Ua silia ma le fasefulu (40) tausaga o auauna Peseta mo kamupani vaalele eseese e aofia ai ma nisi o kamupani vaalele a le atunuu. O le Aso Gafua o le vaiaso nei aso 16 o Iuni i le sefulu i le po lea na faataunuuina ai le malaga muamua lenei a le Fiji Airways.
Na saunoa ai Peseta o le a mataituina le faamoemoe, a lelei ma toatele le mamalu e faaaogāina le tautua, o le a mafai ona toe faaopoopo nisi malaga i le lumanai.