“Ou te faafetai i le Alii i aso uma lava; e lē aunoa ona viiga i lo‘u gutu.” O le fuaitau lea a le faisalamo o loo fai ma mau tauave a le tina matua ia Maila i aso uma o lona soifua, pei ona ia molimau ai i lona aso soifua i le Aso Toonai na tuanai atu, lea na aofia potopoto ai ona tauaiga uo ma aumea mamae, aemaise o lana ekalesia pele faapea nai ona alo ma a latou fanau, i le Roxburg Park Hotel i le aai tele o Melepone.
Na muamua faafoi le viiga ma le faaneetaga i le Tapaau sili i le sauniga na saunia e le susuga i le faafeagaiga taulagi ia Rev Simalu Cowley, a o faavailolo le tapuaiga a le faletua ia Ulima, ona alo ai lea i le taumafataga tele na tali ai le sua ma taumamafa le mamalu i le valaaulia ma Samoa na potopoto, lufilufi ai ma le keke aemaise o faaaloaloga masani i tu ma agaifanua faa-Samoa.
E toaono o la alo ma le tofa ia Maunatu, toafā tama ma teine e toalua, toaiva o la grandchildren, ma lo la great grandchild e toatasi. Na soifua a‘e le tausi ia Maila i le afioaga o Fasitoo-Uta ae ua faamalolo (retired) nei i Vaitele Fou.
E toalua nai ona uso ma o latou tuagane e toaono, o se tasi o ona uso na malaga faapitoa mai lava e molimauina ma fia auai i le fitusefulu tausaga o si ona uso le tausi ia Maila.
Ia tolauapi le Au Agelu a le Alii ma siosiomia oe si o matou tina peleina, auā ua faaalitino le lelei o le Alii, i nei tausaga e tele o lou soifua, ma ia foai nisi tausaga se tele mo la tatou mafutaga.
O moomooga alofa ma faamanuiaga mai si o matou tamā ia Maunatu Faletolu, ma si au fanau pele, Sala, Ruta, June, Judy, Rodney, Robert ma o matou aiga ma a matou fanau uma mo oe Mum. Manuia lou aso soifua. Happy Birthday Grandma!
