Aulelei le Samoa moni i ana laei Samoa

Faalauiloa laei a Susana o Samoa i Brisbane, fesoasoani malosi le Enchiro Laei i le faamoemoe
Faalauiloa laei a Susana o Samoa i Brisbane, fesoasoani malosi le Enchiro Laei i le faamoemoe

E aulelei lava le Samoa ia i ana lava puletasi ma alo‘a velo atu loa ma faasolo Samoa moni ia ua uma upu.

O le afiafi o le Aso Toonai na tea nei sa tatala aloaia ai le faalauiloa o le tamaoaiga o oloa Samoa e ala i laei eseese a le Susana o Samoa lea o loo tele ina talimanao i ai le itupa vaivai faapea foi alo‘a o alii.

Sa tatala aloaia le faamoemoe i le sauniga lotu na taitaia e le Susuga ia Rev Faasoi Maua mai le EFKS Eastside. Mae‘a le sauniga ona faagasolo lea o le polokalame o le po matagofie.

O le kapeteni o le faamoemoe o le Afioga ia Toleafoa Ian Asiata teine o le ata o le Miss Lionheart Koko D’Vyne lea sa manumalo ma faapale mai lona Miss i le Faafafine Pageant a le Lionheart i le 2012. Na fiti solo ma leiloa se mea e migoi ai nai isi toeaiina i le mālie tele o le teine faafiafia i lea po.

O se faamoemoe tamaoaiga i le tele o ituaiga laei eseese, e lē gata i puletasi ma alo‘a a o mamanu ma tifiga eseese auā le mamalu o le atunuu, ae faapena foi i sauniga lotu.

E fai foi o le felanulanuai o lanu ma mamanu eseese a o ituaiga su‘i eseese ua lē masino le matagofie sa tuufaatasia e le Susana Samoa.

E lei tuumamaina e le sa o alii le aulelei o tifiga a tina ma tamaitai e ala i alo‘a ma ie faitaga i soo se tuaiga sikaili matagofie ua i laufanua o Kuiniselani nei.

E toatele le mamalu o le atunuu sa auai e lē gata o le Susuga ia Rev Perelini ma le faletua ia Tiliilagi Tauilo ma nisi o faafeagaiga ma faletua, ae faapea foi taitai o mafutaga.

Sa auai foi le taitai o le mafutaga Tuufaatasi a Samoa i Kuiniselani le Afioga Taulapapa Lemalu Roy Slade ma le faletua ia Joyita Slade ma nisi taitai o Sosaiete ma le aufaipisinisi Kuiniselani nei aemaise le mamalu lautele o le atunuu.

O le lagolago malosi a le afioga i le aloalii ia Galumalemana Naea Harry ma le faletua ia Wendy Apu Timoteo ma le nofoaalo sa faafaigofie ai le faamoemoe a le Susana o Samoa i le latou faalauiloa ma ua mauaa le latou faiga paaga a le Susana o Samoa ma Enchiro Laei.

Na faaiuina le faamoemoe ma le manuia sa leai se mea na gāsē ina ua faalalo le toto maualuga ma le suka o le auvalaulia i maoae o le pa‘ō a le faili a le Mt Vaea, le susuga ia Brad Brown ma le vaega.