O se vaaiga uigaese i le tumutumu o susuga i Faafeagaiga taulagi ma o latou faletua faapea ekalesia eseese, aemaise o uo ma ē masani faapea aiga pele. Na o latou molimauina toe taimi o le susuga i le Toeaina ma le tiakono, le afioga ia Tupai Taotua Ropati Robertson i le Aso Lulu (18 Me, 2016) i le sauniga faale aiga ma le Aso Faraile(20 Me, 2016) i lona toe sauniga o le falelauasiga.
O le afioga ia Tupa’i Taotua o le alo o le susuga i le faafeagaiga ia Uili Robertson mai Salelologa ma le faletua ia Fualole mai le afioaga o Satupaitea. Ua fai i lagi uma la la’ua folauga. Sa taitaia le sauniga faale aiga o Tupa’i Taotua Robertson e lana faifeau le susuga ia Afa Pulotu ae na lauga mo le upu faamafanafana si ona atalii Pastor Heker Robertson. O loo faifeau nei i le ekalesia o le Destiny i Lower Hutt. O molimau uma na ta‘ua ai lenei tamaalii o se tagata tausaafia ma le filemu, e lē soona gaoia, ae a sasaa le tofa e malilie tagata uma. E loto alofa i soo se tagata o laua aiga uma. E malosi lana tautua i lona nuu ma le aiga i Samoa.
Sa taitaia le sauniga o le falelauasiga e lana faifeau le susuga ia Afa Pulotu. O ia foi na folafola le finagalo o le Atua ma faamafanafana i le faletua ia Mālū, le nofoaalo faapea le mamalu i Aiga na lua faapea le aofia ua tuua, ae lagolago i ai le vasega o faifeau o isi o lala a la latou ekalesia i talosaga ma le faitauina o le Tusi Paia.
Na valaau faaaloalo aiganalua i faafeagaiga ma o latou faletua faapea uo ma ē masani mo le taumafataga matagofie na faia i le Maota o le ekalesia i Mascot, Magele ma na faaiuina i faaaloaloga masani i taimi faapenei o pelega o le susuga i le ToeainaTiakono lea na fetalai (malotoga) ai le fetalaiga ia Taotua Iosua Robertson o le uii o alo o le afioga ia Tupai. O ia foi na māvae ai le tamā ia fai lava e si ona atalii o Taotua Iosua faaaloaloga o lona toe taimi.
Na faapea ona faamalieina ai le aufaigaluega a le Atua ma le aumautofi o le ekalesia, mafutaga a tina, faapea foi isi ekalesia na auai, ma le faatau paia a Tumua ma Pule i le malo o toga, tupe ma palapala a malo; o pelega o le afioga o le Tiakono Toeaina.
E lei alo tamala lenei alo o le atunuu le fetalaiga a Taotua Iosua na soifua mai i Niu Sila ae ua matuā faamanuiaina i lana gagana Samoa ma lana aganuu lafolafo. E avea foi lenei avanoa e momoli atu ai faamaisega a le Samoa Times i le tina ia Mālū ma le fanau pele faapea aiga ua tuua.
