O se tausaga o le a manatua pea i le talafaasolopito o Samoa i le maliliu ai o nisi o taitai iloga o Samoa aemaise i le atina‘e o aoaoga ma le atina‘e o tamaitai.
O lea e lei leva atu ona molimau le atunuu i le tuumalo ai o le afioga Leaupepe Fuatino Faimaala, le uluai tamaitai faipule o le Palemene o Samoa, le uluai tamaitai foi na avea ma Faamasino o le Faamasinoga o Fanua ma Suafa, ae o lea foi ua tuumalo se isi foi tamaitai ua fesootai pea lona tagata ma le atina‘e o aoaoga, o le gagana ma le poto salalau o fanau a Samoa.
O se tagata muamua o Samoa na faauu mai ma le faailoga o le Tofamanino o le Poto Salalau, o se tasi foi o tamaitai muamua na ofi atu i le Palemene o Samoa, o lē sa galue i le tofi Faatonu Sili o Aoga ma e mulimuli ane faatūina le Iunivesite ua aoao mataupu uma i le gagana Samoa le Iunivesite o Le Amosa o Sa Vavau.
O lona sao i le gagana Samoa ma lona aoaoina o le a manatua pea e augatupulaga fai mai o le atunuu. O se tusitala, o se faiaoga, o se taitai i le faamatai ma se taitai i upufai o Malo ma ua moni ai le upu, “Auē, ua maliliu toa, ua maumau ai aupega o le taua”.
E ese foi le maualuga o taumafaiga a Aiono. Na soifua mai o ia i le tausaga e 1932 ma o le laitiiti lava o lona olaga na ofi atu ai i aoaoga i Malifa ma e ui i le laitiiti e lei taitai atoa le lima o ona tausaga, ae na faataga lava ona alu atu i le aoga ma o lona fiafia i aoaoga na avea ai o se tasi o tagata aupito laitiiti na ofi atu i aoaoga i fafo ma faaeaina ai o ia.
Sa galue i se vaitaimi i le Iunivesite i Aukilani o se faiaoga, ma o le Samoa muamua ua a‘ea lea foi laasaga ma e pei lava ona galue ai i fafo ma Samoa nei o se tasi lenei o faiaoga laitiiti toeitiiti lava a tutusa pe laititi atu foi i tama ma teine aoga na ia aoaoina. E tele suiga o le gagana ua fesootai ma lenei auauna ma o lana talitonuga lava i faamamafa ma faailoga o le gagana Samoa, afai e lelei lau faa-Samoa e te lē manaomia faamamafa, ma o se lu‘i malosi lenei i le ola tau atia‘e i le suesue ai i le gagana e faaaogā i lenei galuega.
O lana tautua faatusitala i le tusia ma le faaliliuina o tusi faitau ua faamanuiaina ai le toatele o fanau. O lona sao i upufai o malo na ofi atu ai i le Palemene o Samoa i le fu‘a a le Vaega faaupufai e puipuia aiā tatau a tagata le HRPP. O le 1997 na ia faatuina ai le Iunivesite o Le Amosa o Sa Vavau. O se taitai foi i le unaiga o le sao o tina ma fanau o le Pasefika.
O le faamaisega a le Malo na fofogaina e le Alii Palemia ma le faamatalaga a le taitai o le Malo, e tāua tele le sao o lenei tamaitai i le atina‘e o Samoa e lē gata i aoaoga aemaise i upufai o le atunuu, auā e sao mai lenei tamaitai i faauluuluga o nei auaunaga o loo iai pea Samoa i se tulaga o loo tele lava i tamā faauluuluga o ofisa, o aoga aemaise o le faapolokiki.
O lona a‘ea o le tulaga maualuga o le avea ma tagata ua umia le faailoga o le Tofamanino o le Poto Salalau, le PhD o se matatia maoa‘e lea mo Samoa aemaise lava i se tamaitai na ausia lenei tulaga.
O faamaisega na fofogaina e le alii Palemia e mo le aiga, le fanau loto faavauvau ma le afioga Le Tagaloa Pita Alailima i le valaau paia i lenei auaunaga tāua o Samoa. E maliu le afioga Aiono Fanaafi ua 82 tausaga o lona soifua.
