O le Aso Sa na auai atu ai le afioga i le Palemia o le malo o Niu Sila nei, Prime Minister Rt. Hon. Toosavili John Key ma lona faletua o Bronagh Key, sui o le palemene MP Alfred Ngaro ma lona faletua ma nisi o sui tauva fou le susuga ia Misa Fia Misa Turner ma le sui o Mt Roskill, i se sauniga o le lotu tuufaatasi a aulotu e 25 a le Ekalesia Katoliko i Aukilani nei lea sa faatasia uma ai le toatele o tagata lolotu.
O le Afioga Patele Michael Endemann sa taitaia le sauniga ma le fofogaina mai o le Afioga Paia ma le finagalo folafola mai e ala mai i lana auauna.
E le gata o le sauniga masani a le Ekalesia sa faataunuuina, ae o se mafutaga na sili atu foi lona tāua auā o le taimi muamua lenei ua ulufale ai le afioga i le Palemia o Toosavili i le maota o Maleola ma o le isi vaega sili ona matagofie ona ua lotu tonu mai lava Toosavili i lea sauniga o le faamanutuina ai o le Aso Sa mo Tamā.
Na saunoa la le Afioga Patele e tusa ma lana lauga ma na faatāuaina ai ma faamanautu i le palemia, le tāua tele o ia ona o ia o le tamā o le atunuu o Niu Sila ma e tāua ona ia matuā faatāuaina ma le mautinoa e leai se tagata e faatauvaa ma e tutusa uma lava tagata.
Na saunoa foi le Palemia ma faasoa mai lona soifuaga, i le itiiti o le taimi na ia iloaina ai si ona tamā ae maliu loa ma faapena loa ona tauave tasi mai le tausiga o ia ma ona tuafafine e toalua e si ona tina lea na aoaoina mai ai lava lona olaga ina ia tinou ma galue malosi ma le faamaoni mo lona lumanai.
Na faaalia foi le loto fiafia tele ma le faagaeetia o le afioga i le Palemia ona o le avanoa tāua ua ia maua ua mafuta ai ma tagata Samoa i le sauniga lotu aemaise lava ona o le faatāuaina ai o le aso mo tamā.
O le saunoaga foi a Toosavili na ia faailoa ai le tele o le suiga ma le ausia e fanau aoga o tulaga lelei ma agavaa ua siitia ai le fuainumera o tamaiti mai aoga maualuluga ma Iunivesite ua faamanuiaina e tusa ma aiaiga o ausiaga o le tulaga aoaoina. Na ia ta‘ua foi le agai pea i luma o le ausiaina e tagata Samoa o tulaga maualuluga i totonu galuega ma pisinisi ma o ni suiga lelei tele lea mo tagata o Samoa.
Na mae‘a le sauniga ona saunoa lea o le Peresitene, afioga Afuamua Seve Lafaele na fai ma sui o le Maleola ma momoli ai le loto faafetai i le afioga i le Palemia ma lona faletua ona o le auai mai i le sauniga ua maualuga ma matagofie ai foi le viiga o le Atua ona o le avanoa tāua ua maua e tagata lolotu e mafuta ai ma feiloai ma lana afioga ma le faletua, aemaise o sui o le malo faapena foi ma sui lagolago o le mafutaga malosi a le Pacific Collective.
