‘Aua le isuisu fua i mataupu e gata i le lotoifale o le iuni lakapi a Samoa’…Tuilaepa

Ua folasia nei i luma o le Komiti Faatonu e pulea le lakapi i le lalolagi le World Rugby lea sa iloa muamua i le igoa o le International Rugby Board poo le IRB, nisi o mataupu o loo vevela ai le lotoifale o le pulega o le iuni lakapi a Samoa ma nisi o tama lakapi o le tatou Manu Samoa.

O le tuanai o vaiaso sa lipotia ai se tusi faaseā a nisi o tama o le Manu Samoa na ave i le taitaifono poo le afioga i le Palemia susuga Tuilaepa Lupesoliai Sailele Malielegaoi, ma ave foi i le pulega o le lakapi i le lalolagi, ua maua le avanoa o le Palemia e fofola ai le fala ma sui o le pulega o le taaloga ma talanoa ai le agai i luma o le atinae o le lakapi i Samoa. O le malaga a le Palemia i Brussels mo nisi o fonotaga na feiloai ai loa i le ofisa o le Amapasa o Samoa i lea atunuu ma le taitaifono ma ni sui o le pulega o le lakapi i le lalolagi.

O le pepa o faamatalaga faalauaitele mai le ofisa o le Palemia i le Aso Faraile na tea nei na faailoa ai nisi o mataupu, lea sa ta‘ua ai sa ave le tuualalo a Tuilaepa i le pulega o le taaloga e faaeteete i le soona isuisu fua i mataupu e gata i le lotoifale o le iuni lakapi a Samoa.
E lei ma‘oti mai i le pepa o faamatalaga poo vaega maaleale o mataupu nei sa agai i ai finagalo faaalia, ae na ona faapea mai o nisi o mataupu sa laga e nisi o tama lakapi. Sa agai foi se finagalo Tuilaepa i le faailoa atu i le pulega o le lakapi i le lalolagi e lē tele ni tamaoaiga tau tupe o maua e le Iuni a Samoa auā o se atunuu o loo i le vaega o au mai atunuu o le Tier 2, ma e leai se latalata i tamaoaiga tau alauni o loo maua e tama lakapi i au a atunuu o loo ile vaega o le Tier 1.

Ua ave le valaaulia a le taitaifono o le lakapi a Samoa poo le afioga i le Palemia i le pulega o le taaloga i le lalolagi e malaga mai ai i Samoa e silasila i le tulaga ua iai le atinae o le lakapi, ma ia silasila foi i le tulaga o loo pulea ma faagaioia ai galuega a le Iuni lakapi a le atunuu.

Ua faailoa lea tulaga i le au o se finagalo o Tuilaepa i se fuafuaga a le pulega o le taaloga e malaga mai i Samoa i se taimi o Ianuari o le tausaga fou.
Le feiloaiga a le Palemia o le taitaifono foi o le iuni lakapi a Samoa ma le taitaifono o le lakapi a le lalolagi le alii o Bernard Lapasset ma nisi ofisa sinia o le pulega o le taaloga. O le ofisa o le Amapasa o Samoa i Peleseuma poo Brussels na faia ai lea feiloaiga i le Aso Lulu ua mavae