Au filifilia a Niu Sila i le taamilosaga The Fast5

Ua fuafuaina nei se tasi o taamilosaga fou i le taaloga o le Netipolo i Niu Sila, o lenei faatinoga o le taaloga i sona faiga fou, e faapea o le a matuā televave ai le faaaogāina o le polo aemaise ai le saoasaoa i le faatinoga o le taaloga Netipolo. E tolu aso o lea ua fuafua e faia ai lenei taamilosaga i Aukilani, ma e oo mai i le taimi nei ua mafai ai ona mautu atunuu o le a auai o latou au i lenei tauvaga.

Ua mautu mai le auai o Ausetalia, Egelani, ma Aferika i Saute, Jamaica , Malawi ma Niu Sila. I le taimi nei ua mae‘a ona faatulaga faagasologa o taaloga o lenei taamilosaga e faia i le Vector Arena i Aukilani i le aso 9 Novema seia oo i le aso 12 Novema 2012.

Na saunoa le faauluuluga o le Netipolo i Niu Sila ia Raelene Castle o se fiafiaga tele ina ua mafai ona talimalo Niu Sila i lenei taamilosaga fou i le taaloga o le Netipolo, e atili faatupulaia ai le fiafia tele o tamaitai i lenei taaloga aemaise lava foi mo Niu Sila.

O le suiga o le a iai ua faaaogaina na o le toalima tamaitai i totonu o le malae i le taimi o le taaloga, ae na o le toasefulu i le au. O le au filifilia la lenei a Niu Sila sa filifili mai i le toatele o tamaitai Netipolo i Niu Sila, ma le talitonuga ua matuā malosi le au a Niu Sila i lenei taamilosaga. Talosia ia atonu e lē o toe mamao maua foi lea o se avanoa o Samoa i totonu o lenei foi faalagamea i le taaloga o le Netipolo.

 

1 Maria Tutaia

2 Irene Van Dyk

3 Anna Thompson

4 Laura Langman

5 Kayla Cullen

6 Bailey Mes

7 Leana de Bruin

8 Anna Harrison

9 Casey Williams

10 Katrina Grant

Coach: Waimara Taumaunu