Atoaga 21 tausaga o Mose Faavae

O loimata o le fiafia ina ua toe maua le atalii na leiloa i le tele o tausaga a o iai pea ona mātua i Samoa le susuga ia Fineaso ma le faletua ia Tausaga Faavae. O molimau lea a le tamā o le galuega i lana Ekalesia e tusa ma le talaaga o le atalii ia Mose Faavae ina ua atoa lona 21 tausaga o lona soifua i le Aso Lua na tea nei.

O se faamanatuga o loimata e pei ona toe faaopoopo i ai le tamā ia Taituave e tusa ma le tulaga na oo i ai lea talavou, a o nofo i se tasi o aiga o le susuga o le faafeagaiga ia Rev Fineaso Faavae.

Na saunoa le tamā, o lona atalii na leiloa ae ua toe maua, na oti foi ae ua toe ola. E mafua nei saunoaga ona o le olaga o le alii sa iai i Niu Sila lea na tuua ai i se tasi o lona aiga i le taimi a o iai pea i laua i le galuega a le Atua i Samoa.

Peitai ua laki le manuia o o la suafa i le se‘i lea na o mai ai loa ma le faamoemoe e toe faafoi mai le la tama o loo i Tauranga i nai tausaga ua mavae.

Ina ua o atu le aiga e aumai le alii o Mose, e lē o iai i le aiga lea na tuu ai e nofo ai, peitai o loo i le matafaga, o loo fai maso i le mālūlū o le po ma o lana galuega lea i le olaga atoa.

Na ta‘ua atili e le tamā o le aiga, o atigilima ma lavalava e lē fia vaai i ai ona ua pei o se tamaititi e leai se aiga. Peitai o le faanaunauga na ala ai lava ona toe foi e saili si a la tama, ona o le meaalofa o ia mai lea Atua ma e tatau lava ona faaauau le galuega o le tausia o ia.

O le sauniga o le agaga faafetai ma le fiafia ina ua mafai ona toe faatasia le aiga ma toe auauna faatasi ai i totonu o le Ekalesia e tusa ma le tulaga na iai i Samoa i aso ua mavae.

O le taimi nei o loo galue le alii o Mose i tiutefai i totonu o le Ekalesia Nasareta i East Tamaki, ma o ia o loo iai i totonu o le faili.
Na saunoa foi le susuga ia Tauilo Vaotuua, o se fiafiaga tele ia te ia ina ua mafai ona toe maua mai lenei talavou a o lei oo lona olaga i se isi mea matuia.

O le susuga lava ia Vaotuua na faia le tatalo e faamanuia ai le aso soifua o le alii o Mose, lea na ia ta‘ua o le igoa o Mose, o se igoa tāua tele ona o le taitaiga o le nuu o Isaraelu i aso o le nofo pologa ia Aikupito.

Na faaiuina le faatasiga i se toonai tele lava ma faataunuuina ai lava faaaloaloga a le aiga faatasi ma faamanuiaga na ofoina ane e le Ekalesia ma le Autalavou ina ia toe maua ai e le alii o Mose nisi tausaga se tele mo lona soifua.