Na faaleaogaina e le World Rugby ma le RWC 2019 le tagi a Belgium, Spain ma Romania e toe fa’ataalo ai taaloga mo le RWC 2019. O lea tagi na tau sameme ai le faamoemoe o Siamani, Portugal ma le Manu Samoa i taaloga o loo loma nei mo le ofi atu i le Ipu o le Lalolagi.  Ae ua faatonuina e World Rugby le faataunuuina o taaloga ua atofaina e maua ai se sui o Europa e tauva ma le sui o le Pasefika, o le Manu Samoa lea. O le isi vaega o le faaiuga ua ofi ai Russia i le RWC ae to’esea Romani na iai.

O le tala lelei mo Siamani, o le’a toe foi le ‘au i le ato’atoa lelei mo le taaloga ma Portugal i le aso Toonai, lea o le’a su’e ai le ‘au e feiloai ma le Manu Samoa i Apia i le aso 30 o Iuni.

O le taaloga e fai lea i Heidelberg i Siamani i le aso 16 Iuni. O le ‘au e manumalo o le’a malaga i Apia, ma toe foi ai mo le taaloga lona lua i le aso 14 o Iulai i Europa lava.

O le ‘au e manumalo i taaloga ia e lua o le’a ofi i le RWC 2019 i Iapani i le Pool A o lo’o fa’atali mai ai Iapani, Aiealani ma Sikotilani. A’o le ‘au e faiaina e iai le avanoa e tasi e taalo ai i le Repechage e tauva ai ma Canada, Africa 2, ma Hong Kong po’o le Cook Islands i le Pool B o lo’o fa’atali mai ai Niu Sila, Aferika i Saute ma Italia  ma Africa 1.

Afai i faaiuga o taaloga a ‘au ia e lua, e foliga mai o Portugal o le ‘au malosi atu ia Siamani. I taaloga e lima i Europa B na faiaina uma taaloga a Siamani. Ae manumalo Portugal i ana taaloga uma e lima. Ae i ripoti mai Europa ma Siamani  ua toe faafoisia Siamani i le malosi ma le ato’atoa o lana ‘au mo le taaloga ma Portugal i le aso Toonai.

O le ‘au e manumalo e  malaga mo Samoa i le vaiaso fou.

A’o le Manu Samoa o le’a feiloai ma Tonga i le taaloga lona lua o le PNC i Fiti. A mae’a ona toe foi lea i Apia e faatali mai Portugal po’o Siamani. Ae i ripoti mai Fiti lata mai, o lo’o iai tama manunu’a o le ‘au mai le taaloga ma Fiti ua mae’a nei.

O Logovii Mulipola ua masae le maso o le vae (hamstring) e le avanoa mo le lua vaiaso. O loo fai le HIA a Ray Lee Lo, o su’esu’ega lea o manu’aga o foliga ma le ulu e fa’apea foi le alii o Rodney Iona.

Faaiuga o taaloga a Siamani ma Portugal lata mai

Germany 3 Russia 57, 18 Mati 2018

Spain 84 Germany 10, 11 Mati 

Belgium 69 Germany 16, 3 Mati 

Germany 0 Georgia 64, 27 Fepuari 

Romania 85 Germany 6, 10 Fepuari 

Portugal 27 Poland 25, 24 Mati

Portugal 29 Moldavia 10, 10 Mati

Portugal 31 Switzerland 17, 24 Fepuari

Portugal 36 Netherlands 12, 10 Fepuari

Portugal 35 Czechoslovakia 12, 27 Novema 2017