Atoa moso’oi o le faasolo ina ua pale ile alofa moni e le mamae, Lutena ma Kaiva Mulitalo

A’o tuu fesili ma taumatemate lagona ole alii pe tua ini ā  moemitiga ole olaga, ose vaa lava e felafoa’ina pe a oo ina loulouā le sami. E taumate foi faa’ato ta’ita’i māmā sagia pe a le tutusa loto. E timu’ia ma laina  le ae iai lava le aso e laofie ai ma maua ai le masele e faasolosolo toto’a ai mafaufauga i le faigamalaga o le alofa faaleuo. O le faamoemoe lava e taunuu, ole laau ole soifua lea.  
Na fulifaō vaa o mala ae lagā va’a o manū ina ua o gatasi le futia ma le umele ma tini lau ae tuufaatasia le aiga fou ole susuga ia Lutena ma si ana manamea ia Kaiva Mulitalo, lea na faataunuuina i le Aso Lulu  15 o Oketopa.
Na faasisila ma tausani fiafia  manufelelei ole togalaau matagofie ole Logan Reserve, ao  fesiligia le alofa ole tausala lea na molimauina e aiga ma uo i lea aoauli ao tau gaga ifo ave o le la ua lata ina goto atu i lea afiafi.
O le ulugalii fou ua leva ona amataina le faigauo ma ua mausali foi le alofa feavata’i ua onomea ai le tuufaatasi o i laua e avea ma tino e tasi. O matua o tamaitai faaipoipo ia Kaiva,  osi ona tina (fa’ilagi folauga) ia Itagia Faafeu I’uomalo mai Ulutogia Aleipata ma lona tama o Puletini Leulua’iotofiga Faafeu mai Lalomanu Aleipta O tua’a ole alii faaipoipo ia Lutena, o si ona  tama ia Pa’u Lautā mai Samatau & Saluafata ma lona tina le tausi ia Si’utu Mulitalo mai Salelologa

Sa faapaia ele tamatai faifaaipoioga ale malo ae ole susuga ia Ps Sini Tauti sa feagai ma le tatalo faamanuia mo le aiga fou ma nisi vaega taua ole sauniga. O le Tofa ia Leifi Togipau sa fai ma fofoga ole aso.
Na lologo le aofia ao faafeiloai faapitoa ele tama/tua’a ole alii faaipoipo le tofa ia Pa’u le ulufale atu ole tamaitai faaipoipo  o ia ose tasi o le nofoaalo ua le toe ta’u esea o ia.

O le tofa foi ia Pa’u Mulitalo sa feagai ma faaaloaloga, ao  le susuga ia Talosaga Auvaa sa molimolia se faafetai i le paia o aiga ga lua ile matagofie o tapenaga ole aso e pei ona faia ai le faatau pa’ia. Sa faatumulia i aiga ma uo aemaise le ekalesia AOG a Carole Park ma se vaega o le Ekalesia Aso Fitu Koneferenisi.
Manuia le aiga fou Lutena ma Kaiva Mulitalo! Alofaaga mai o oulua aiga uma lava i soo se tafa ole lalolagi.Ulugalii fou ma la uo sili ma aumeamamae Lutena ma Kaiva Mulitalo

_Ulugalii-fou-ma-la-uo-sili-ma-aumeamamae-Lutena-ma-Kaiva-Mulitalo-WEB