Ua faagasolo nei galuega toe faaleleia o le fale o le RSA i Apia le tasi o pine faamau o le faamanatuga o fitafita na maliliu i taua e pei ona faamanatu ai le 100 o tausaga. O se galuega ua faia e sui o le asosi o fitafita toe foi mai i taua a Samoa le Samoa RSA.
Faaalia e le Peresetene o lea Asosi, ia Tuala Auimatagi Joe Ponifasio e ese le faamanatuga o lenei tausaga ona o le a faamanatu ai le 100 o tausaga o le taua muamua a le lalolagi, lea ua faapea ona aofia ai ma Samoa i lea faamanatuga.
E pei ona silafia o le fale lea o le RSA atoa ai le uati o loo tu i le ogatotonu o le taulaga o Apia, o maa faamanatu tetele na o lena vaitau ua tusia ai suafa o alo o Samoa na tautua i le fitafita a Niu Sila i lea taua muamua ma faasolo mai ai lava.
Talu mai le tausaga e 1946 na faatu ai lenei fale ua manino le toatele o tagata Samoa ua ofi mai i le Asosi ona ua oo mai lava i lenei vaitau le tautua a alo o Samoa, e lē gata i fitafita i vaega eseese o le lalolagi ae faapea foi le galuega faapuipuiga a Leoleo lea foi ua agai atu i ai le toatele o tagata o Samoa e auauna ai. Faaalia e Tuala Auimatagi le tāua tele o lenei tausaga aemaise o le taumafaiga ina ia manatua e fanau a Samoa le tupulaga lalovaoa le tāua o le sao o Samoa i le tausiga o le filemu ma le unaiga o le saolotoga o le lalolagi atoa. O le galuega ua amata nei o le toe vali ma faamamā le fale o le RSA lea ua faaaogā i le tele o taimi o se fale faafiafia i le ogatotonu o le taulaga o Apia.
E vaiaso atoa le faamanatuga o le ANZAC i lenei tausaga ma na ta‘ua e Tuala Auimatagi e amata mai lava i le Aso Sa a sau nei i se sauniga lotu e manatua ai fitafita ua fai i lagi a latou folauga, ma fitafita o loo tautua e oo mai i le taimi nei aemaise foi i Leoleo.
E lē gata i lea o le vaiaso atoa o le a faagasolo ai polokalame auā le saga faalauiloaina o le ANZAC i Samoa lava ia seia oo lava i le vaveao o le Aso Toonai le aso 25 o Aperila lea o le a faia ai le sauniga lotu i le taulaga o Apia ma lalo o le uati tele ina ia manatua ai pea lenei auaunaga o le tausiga o le filemu.
O le taimi lenei e silia i le to‘a 2,000 lava alii Samoa o loo tautua i le fitafita a Amerika, ma o le toatele foi lena o loo tautua i isi fitafita e pei o Niu Sila, Ausetalia faapea ai leoleo a Malo Aufatasi i Aferika, Timor i Sasa‘e, le Atu Solomona ma o auaunaga ua faafetaia foi e Samoa e ui e leai sana fitafita o iai.
O le ofisa o Niu Sila ma Ausetalia o le a galulue faatasi i le unaiga o lenei aso tāua i lo latou foi talafaasolopito lea ua faamanatuina i Samoa nei i tausaga taitasi. O tausaga ua mavae e na o le aso lava o le ANZAC sa faamanatu ai lenei tautua ae o le tausaga la lenei ua ese le faamanatuga ona o le atoa ai o le 100
tausaga talu ona faamanatu lea taumafaiga.
