O le aso muamua o Ianuari o le tausaga nei, 2010 na atoa ai le tausaga talu ona tupu le faalavelave i le nuu o Tafua-tai i Savaii, na maliu ai le teineititi o Grace poo Tise Faasalafa, e 10 tausaga le matua. Na faia sailiga i le vao a le nuu faapea ma sailiga i le sami e lei manuia.
E 14 tausaga o se alii talavou o loo molia i le maliu ai o le teineititi ma o loo molia i le fasioti tagata faamoemoeina, ma le moliaga o le faia o se faiga aiga fai faamalosi (rape). O loo talitonu leoleo na faatino e lē ua molia lea gaioiga solitulafono i le teineititi ma ia lafoai ai i le sami le tino o le teineititi.
O le Aso Lua, 24 o Mati 2010 na amata suesueina ai molimau e toa sefulu a leoleo e lagolago ai moliaga e lua faasaga i le alii 14 tausaga o loo molia, ma ua le mafai ona faalauiloaina lona igoa, ae o se taulealea lava o le nuu o Tafua i Savaii.
O le tina o le teineititi, le fafine o Faiga Faasalafa na ia faamatala i lana molimau tuu fofoga le afiafi o le Aso Tofi, aso muamua o Ianuari 2009 a o faia lana saka, ae o loo taalo lana tama teine i luma o lo latou fale. Na ia faalogo atu o valaau le igoa o lana tama teine o Tise (igoa valaau) e lona tamā. Sa ia vaaia o tau tatala le fusipau o le toeaina o le a sasa ai Tise, ae na momo‘e ese ona ua fefe.
O le taimi mulimuli lava lea na vaai ai le tina i lana tama, ona sa le ano ane i ai ona sa feagai ma le gaseseina o le meaai o le afiafi. Na malu a‘e le afiafi ma ua fai faigalotu e lei alu atu lava Tise, seia oo lava ina fai meaai.
Na fesili le tina i le isi vaega o lana fanau e toafā ma isi tagata o le aiga poo fea o iai lana tama, ae o le tali ane e leiloa poo fea o iai.
O le po lea na alu ai le sailiga a le tina i aiga o le nuu ma faasolo atu i le fale o le faifeau sa fai ai se tauvaga tausala, ae sa siliga lava se tali fiafia.
O le foi ane o sailiga a le tina mai le maota o le faifeau sa fai ai fiafia, ae fetaui ai ma lē o loo molia. Sa fesili i ai le tina pe na te lei vaai ia Tise.
Na tali le alii sa vaai i ai o alu i le maumaga i le afiafi o le aso lea. Na faatoa moe le tina i le po ua te‘a le 12 ae ua siliga lava ana sailiga.
O le aso na sosoo ai na talosaga ai i le nuu mo se fesoasoani ma alu ai loa le sailiga i le vao, peitai o le afiafi o le aso lea na oo atu ai leoleo ma logo le nuu, e taofi sailiga i le vao ae agai i le sami.
O sailiga ia na faamatala le tina mafatia o Faiga, na o atu ai lē o loo molia ma se isi alii talavou ma avatu ia te ia le polo voli sa taalo ai Tise ma le faamatalaga a le aualii, sa la maua i se vaega o le papa e mamao i tai e lata i le sami. Sa oo i ai le tina ma ia alii ma faasino ane le mea na maua ai le polo voli. Na faaalia e le tina, na matuā ofo i le mamao o le mea na maua ai le polo ona e lē masani ona alu mamao faapea lana tama.
O le mutaaga lea o le molimau a le tina i le mea na tupu.
O le tamā o le tina le isi molimau a leoleo na ia faamatala le afiafi o le aso muamua o Ianuari 2009 lea na ia tau sasaina ai le teineititi.
E tatau ona aumai se faaiuga a le faamasinoga i lenei mataupu i se aso o le vaiaso nei.
O loo teena malosi e lē o loo molia moliaga a leoleo i lana molimau na tuuina atu i le faamasinoga, na te lei faia se gaioiga solitulafono i le teineititi.
