Vivii ma faafetai le Olo a Inala ua aulia le tatou fitu tausaga

Vivii ma faafetai le Olo a Inala ua aulia le tatou fitu tausaga

E fita ma gaoā le ala na savalia mai i totonu ole fitu tausaga ele Olo ale Divine Mercy a Inala. Ua toesea nisi, ua fai i lagi le folauga ase tasi o Tamā. Ua faaopoopo mai foi nisi i totonu ae oloo atili ai ona malolosi ma totoa fatu o nisi na amataina mai le Olo ile 2010.

Ose luitau lea i tagata faatoa ofi mai ona o uiga tausaafia ole toatele aemaise ole feau oloo latou momoliina pea e ala lea ia latou faatasiga ma fono tatalo fai pea i po o Aso Gafua ma le asia lea o tagata gasegase. O ni galuega ua taliaina pea ele tele o i latou oloo asia i aso uma e atofaina.

Ole aso 26 o Aperila ile 2010, na amata faavae mai ai le Olo a Inala ma ole taimi lea na o Darra na uluai amataina ae o lea ua lona lua iai Inala. O le ‘afa ole sefululua ile aoauli ole Aso Sa ua tuanai na faamanatu ai le fitu tausaga o le Olo.

 Afioga Patele Epati Tamati ma le au tali Misasa ina ua mae‘a le sauniga

Afioga Patele Epati Tamati ma le au tali Misasa ina ua mae‘a le sauniga

O taimi faapenei na toe tepa ma tomanatu iai le toatele ise tasi foi o Tamā ua fai i lagi le folauga le susuga ia Sio Anae, o i laua ma Otemai Tenisio na tofia e avea ma aposetolo i lena taimi, Taitai Losalia Fenandez ae taitai pese Tolu Pisa Julio. I lena uluai taimi, na malaga mai ai le aposetolo mai Samoa ia Alesana Alalatoa e taitaia le sauniga ae faapaia lava ele afioga ia Patele Epati Tamati.

Ole sauniga ole Aso Sa ua tuanai na faamanatu ai le fitu tausaga, na taitaia lava ele afioga ia Patele Epati ma folafola se upu e momoli ai le viiga ole Atua ona o Lona aao taitai ua afua ai lenei aso. Logo mālie pese ma viiga ole Atua na lagiina ele aufaipese ale Divine Mercy.

Ole sui taitai lava le afioga ia Tagaloa Leitu Tooala sa fai ma fofoga ole aso ma momoli se faafetai ile afioga ia Patele ma le paia o sui mai isi Divine Mercy sa auai.

Na fai ma sui o i latou na asiasi atu le susuga ia Sauafu Silao e faafetaia le paia ile Divine Mercy ona o taumafa felanulanuai aemaise le matagofie ole aso ua muliga ni oli a o ni foli ile laufofoga fiafia o tagata uma.

Laulau 2017

Taitai: Tolu Pisa Iulio

Sui Taitai: Tagaloa Leitu Tooala

Failautusi: Lupe Bernard

Teutupe: Ale Halo Milford

Comments

comments