“O le ava i mātua e faalevaleva ai aso o le soifua”
A faafualoa le soifua o se tasi, ona faapea lea o upu masani a le aufaigaluega a le Atua, o se soifua ua afu. O le mau sii masani mai foi i le Tusi Paia e faaaogā lava e le aufaigaluega, “O le ava i mātua e faalevaleva ai aso o le soifua”.
Ua fetaui tonu lea mau sii i se tasi o tina o le atunuu o ‘Aifetina‘i Temese Pomaniana o Moataa, Fagaloa, Vavau, ma Salailua na atoa le 87 tausaga o lona soifua i le Aso Sa mulimuli o Ianuari 2015, i lona aso 25.
O le viiga lea ma le faafetai sa patipatia e lona aiga i ona alo, o fanau a uso ma tuagane i Samoa aemaise o fanau a ana fanau o loo salalau i itu e fia o le atunuu aemaise o atunuu i fafo, tainane o ona aiga uma i Samoa ma soo se itu o le lalolagi.
O ona mātua ua maliliu o Temese le tamā a o Faafana le tina. O le molimau a le tina o ‘Aifetina‘i, o ia le ulumatua o le fanau e toaono a ona mātua; e toalua tama ae toafā teine. Ua maliliu uma ae totoe ai na o ia o loo soifua pea.
O lana faafetai lea i le Atua i lana tausiga ona o nei tausaga e tele ua ia maua aemaise o loo mafuta ai pea ma ona alo ma lona aiga. O se tina matua na ia faamatala o lana mea fiafia o le lotu.
“E lē mafai ona galo le tala a lo‘u tina ia te au ia ou toaga i soo se meafai o le lotu ma ave la‘u fanau i le lotu. O le mea lena o loo maua ai pea lo‘u ola, ma ou te talitonu lava i ai”. Sa latou ola faatasi uma a o laiti i lo latou aiga i Moataa, o nisi aso ua malaga ma ona mātua i Fagaloa ma Vavau i aiga o ona mātua.
Na valavala le mafutaga ma uso ma tuagane ina ua matutua ma o nisi o ona uso ma tuagane sa valaauina e tautua i le lotu i le tofi faifeau. O nisi sa malaga i atunuu mamao e pei o Niu Sila ma aumau ai ma ua ola a‘e ai a latou fanau.
O le aulia o le 87 o tausaga o lona soifua na ia faamatala, e lē māmā ia te ia ona o se meaalofa silisili mo ia mai le Atua i tausaga uma pe a aulia le aso na soifua ai. O lona alii o Tuato o Salailua ma e toafitu o la alo. E toatolu tama ae toafā teine ma o loo soifua uma mai i le taimi nei. Ua faiaiga uma le toalima ae e lei faiaiga le toalua o se alii ma se tamaitai.
O loo mau nei ma nisi o ona alo ma fanau a ona uso ma tuagane i lona aiga i Moataa, ma o le tausaga ua mavae sa malaga tafao atu ai i Niu Sila i ni faalavelave faaleaiga ma mafuta ai ma nisi o ona alo ma fanau aemaise o ona tauaiga. O moomooga lelei ia saga tului pea e le Atua nisi tausaga se tele mo lona soifua.
