O se aso fou e pua‘ina mai ai manatu fou; a maua le fiafia i le loto o se tina o se meaalofa sili lea ona tāua nai lo auro ma ario.
A o mou mālie atu le Aso ua faapitoa e le lalolagi mo tina i lenei tausaga 2016 poo lenei talutalu fou, e sau lava aso ma toe mou atu. O le aso e timu ai, o aso foi e susulu ai le la, o aso o le faanoanoa ma aso e fiafia ai, o aso foi e ata ai ma aso foi e tagi ai. O vaega e tutupu i le olaga e fesuisuiai pea; e misia foi mafutaga ina ua maliliu le toatele o o tatou tina e pele i loto ma agaga, ae fotuai mai foi tamaitai ua avea ma tina.
O le anoanoai o meaalofa o lenei olaga e feilafi, aulelei, mananaia, taugata ma anagatā; peitai e pala ma mavae atu na mea uma, ae o le maua o le fiafia i le loto o se tina, o se meaalofa sili lea ona tāua nai lo ‘oa o lenei olaga.
A mavae le soifua o se tina ina ua motusia mafutaga a o atoatoa lona fiafia, e lē taumate le alu malie o lana faigamalaga. E soifua foi alo ma fanau ma Tamā faapea aiga ae e tumau pea lena fiafia e faavavau auā sa faia mea silisili mo latou ma fealofani a o mafuta i lenei soifuaga lē tumau.
E pei lava ona masani ai le tele o ekalesia i aso faapenei i le faatinoina e Tina ma faletua o tala, pesega, aemaise o molimau i luma o ekalesia e lē gata o le alofa tuutulu‘i o le Atua i o latou soifua, a o avanoa faaauro o loo faia ai mea sili mo aiga, nuu ma ekalesia faapea mafutaga, faalapotopotoga ma le atunuu.
E manatua lava ma faatāua le tele o galuega tāua e faia e le toatele o tina ma faletua faapea tamaitai i o latou sao tāua. Nisi o tina o loo faapologa lava ma sauāina e le toatele, nisi foi e tiga na o latou faia mea lelei ae inosia lava ma tuua‘ia ma faifai e nisi tina ona e afua mai i le feitagai i le va ma isi tina.
Ae pe se ā le aogā o lenei olaga ma mea lelei e tele o loo faia e nisi o tina ae a leai se fealofaniga ona o le vaai maulalo ma le manatu faapito, ma fai fua o tala o le isi, fai mai le Tusi Paia e inosia e le Atua le tagata e faatupu maseiga i le va ma isi. Aisea e fetaua‘i ai ma vaai fua le isi tina i leaga o le isi tina? Ua na o le Atua o iai le faamasino sili o ia foi e faia le taui.
Ae o le tatalo i le Atua ia alofagia ia iai Lona filemu ina ia fealofani ai tina uma o Samoa i soo se tafa o lenei lalolagi auā ua lata mai le Alii. Faafiafia le loto ma maua le loto maulalo e fia faafofoga foi le Atua ma avea o se lamepa susulu i taimi uma ma aso uma.
O ā ni maanuminumi e ono vevesi ai se aiga ae a auli e se tina o iai le loto mamā, o se aiga foi lena e iai le mamalu o le Atua e tumau ai foi le fiafia. O lena fiafia e amata atu i totonu o se aiga e faapena foi ona faasafua atu i fafo atu o isi faalapotopotoga.
O se tina lelei e silisili lona tau i penina! O tua atu foi o se tamā lelei, o saofai mai ai se tina lelei. Ia manuia tele le faamanatuina o le Aso Sa o Tina o Samoa i le lalolagi atoa seia toe aulia lena tausaga fou!
