O le Aso Gafua na se‘i mavae atu nei aso 28 o Ianuari, na fai ma aso malolo i le Atunuu atoa o Ausetalia, e faamamalu ma faamanatu ai le Australia Day lea e faamanatu i le aso 26 o Ianuari i tausaga taitasi, lea na pa‘ū tonu i le Aso Toonai na tea nei.
A o feagai la le aai o Melepone ma sauniga faalemalo, atoa ai foi ma fiafia mo le aso o le malo tele, ae potopoto faatasi ai foi i le futiafu e tasi le autalavou a le EFKAS Kanana Fou a Tullamarine, e faatino lo latou faamoemoe o le aso mo tu ma aganuu faa-Polenisia, aemaise lava o tu faa-Samoa.
E lua vaega na totofi i ai le autalavou, o le vaega a Ioritana ma Foafoaga Fou, i siva faaatunuu na saunia e Ioritana le siva faa-Tuvalu, a o Foafoaga i le siva faa-Fiti, o nisi o fuafuaga fai na faatino mo le matagofie atili o le aso na aofia ai taaloga kirikiti faa-Samoa, lauga faa-Samoa, gasesega faa-Samoa moni pei o le vavaluina o talo, fofoeina o fa‘i, valuina o popo ma le tatauina o le peepee e faalifu ai le saka sa gaseseina lava e alo ma fanau a le Ekalesia.
Na faatinoina foi faaaliga taleni faaleagaga, ma na maeu lava le matagofie o le molimauina o alo ma fanau Samoa i le faatinoina o tiutefai e le gata i fiafia ma siva, o le gaseseina o taumafa, ae o taleni foi e viia ai le suafa o le Atua o Samoa.
O le susuga i le faafeagaiga ia Ulumoo Ale ma le faletua ia Aano o loo tausia le Ekalesia, o le maota o le galuega na mafuta faatasi ai le autalavou mai le Aso Toonai ma le Aso Sa ma faataunuu ai le faamoemoe i le Aso Gafua. Na taape fiafia le valaaulia ma le faagaeetia, ona ua agiagia le tagāvai o Samoa i lea pitonuu, ona o le aso o tu ma aganuu a le autalavou.
