O se faatasiga tele sa fuafua e le pulega o le faalapotopotoga a le Manukau Pacific Island Trust i Otara, mo tina uma o le aai, faapea uo ma paaga o tagata lautele, sa vaaia ai laufofoga fiafia ma le tausaafia o tina uma sa auai.
O le faapitoa mo le aso o tina i lenei tausaga, ae sa afifi ai ma le anoano o feau tāua, ma isi faamatalaga aoga mo le soifua maloloina, ma le olaga faatina i totonu o aiga ma fafo e ese mai.
O le afioga i le faletua ia Lupe Tofilau Eti Alesana, o le faauluuluga o le Manukau Pacific Island Trust, faapea le pulega sa ia tuufaatasia le polokalame o lea aso.
O le faletua lava foi ia Lupe, sa fai ma fofoga e faalauiloaina ma faatautaia fuafuaga sa faataunuuina.
E ui ina sa faapitoa lava lea aso mo tina, ona talu ai o le Aso Tofi i le aoauli na faia ai, a o lumanai ai le aso sa faamanatuina mo tina o lenei tausaga, peitai sa le tuumamaina foi e tamā latou ia ona o le fia auai, ma lagolago i tina mo lea valaaulia faapitoa.
Sa faamaonia mai e le tina ia Lupe Tofilau e faapea, o le taimi muamua lenei ua tuufaatasia ai e le Trust se mafutaga tuufaatasi e faapitoa lava mo tina o Otara ma isi vaega tau lalata ane.
E le gata o lona sini autu o le fia mafuta ma milo faatasi ma nisi o tina matutua o le atunuu ma le Pasefika, ae e sili foi ona tāua nisi o sini ma aoaoga faamanatu, mo le soifuaga o tina lava latou ia.
O siva ma fiafia ma le faailoaina o taleni a tina, o nisi ia o vaaiga ma vaega faaopoopo i le polokalame o le aso. Ae o le taumafataga lava foi ma le laualo, sa taualuga i ai vaaiga ma vaega eseese o lea aso.
O nisi o tina sa auai i lea faamoemoe, sa fesiligia e le Samoa Times mulimuli ane, Pe manaia le faaauau pea o sia foi faiga mo tausaga taitasi uma e saga faamanatu ai le aso tāua o tina. O le tali a i latou, E matua manaia lava foi sia mea pe a faifai pea.
Sa saunia foi e le Trust nisi o ata sa faatumuina i teuga faapitoa mo tina, faapea ai ma isi faamatalaga aoga mo le soifua maloloina.
O se vaega o faiga meaalofa a le faalapotopotoga mo tina uma sa valaaulia, ma i latou uma foi sa auai ane e molimauina lea aso.
O le faamoemoe sa faataunuuina i le Otara Music Art Centre i le taulaga faatau i Otara, mai le itula e sefulu i le taeao e oo atu i le lua i le aoauli, o le Aso Tofi o le vaiaso na tea nei.
