Ole vaiaso ua mavae, ile Aso Toanai 15 o Iulai ma le Aso Sa aso 16, sa faatāuaina ai e Tupulaga Talavou Katoliko i Aukilani se polokalame ua faaautuina e faapea, Young People you are the Youth of Today) ile faaliliuina ile agaga ole tupulaga talavou, “O tupulaga Talavou ole lumanai lea ole Ekalesia Katoliko autu na faapolokalameina mai pe sa faatonuina mai ele Afioga ile Tamā Paia o Pope Faranisisi i Roma.
Ole Autalavou Katoliko a Magele sa tuufasia ai tupulaga talavou mai le palisi o Sagato Atonio i Mangere Bridge, faapea ai ma tupulaga talavou ole palisi o Sagata Telesia Mangere East, auā le faamoemoe ole Aso mo Tupulaga Talavou Katoliko i Aukilani. O lenei autalavou, e le na’o tupulaga talavou a Samoa e auai ai, ae oloo mafai foi ona faatasi atu iai ma tupulaga talavou mai Toga.
Ole afiafi ole Aso Toonai sa faia ai se faalapotopotoga a tupulaga talavou uma ole vaega i Saute a Aukilani ile falesa a Sagata Telesia i Magele i Sasae. O lenei polokalame sa taitaiina lea ele Autalavou Katoliko a Magele.
Ole matagofie ole polokalame ole pepese ma vivii, fiafia o tagata uma ae faapea ai foi ma le matagofie ole faalogologo i molimau a tupulaga talavou ua toe fesuiaiina ele Atua o latou olaga mai le leaga ile lelei ae faapea foi molimau a nisi o faifeau sa tomatau ai le tupulaga talavou.
O molimau ola nei a tupulaga talavou ua avea ose moemoe fou ua toe tatupu io latou olaga ile latou tuua lea o mea ale lalolagi ae toe liliu mai e ofoina o latou ola mo le Atua ma lna galuega.
O nisi o talavou na le toe auai mai ile lotu ma le mafutaga a autalavou, o nisi ua agai e kegi ma isi sa falepuipui, ae ole masani a autalavou ale ekalesia Katoliko ole faia lea o latou mafutaga tatalo ile afiafi ole Aso Gafua ma le Aso Faraile, e talosia ai tama fanau nei ole ekalesia oloo maimau o latou soifua ile lalolagi. Ole lelei lea ole Atua ma le famaoni ole galuega ale autalavou lea ua faailoa i molimau a nei tupulaga talavou.
Ole taeao ole Aso Sa, sa faatinoina ai le polokalame a tupulaga talavou mo Aukilani atoa. Sa amataina lenei polokalame ile Falesa o St Patricks Cathedral. Sa amataina ile tatalo faapea ai ma pesepesega mai le Autalavou a St Annes, Ina ua maea pesepesega, sa faia le savaliga e amata mai ile Falesa o St Patricks Cathedral ae faaiuina lea ile Victory Convention Centre.
A’o savavali tupulaga, sa latou pepese pea i viiga ole Atua, o isi sa lauina vaega ole losalio, a’o isi sa avea lenei taimi e mafuta ai ile Atua. Ina ua mae’a le savaliga ma ua faamautu nei ile Victory Convention Centre, sa malolo tupulaga ma amata ona tapenapena auā le faaiuina ole faamoemoe.
O polokalame uma ale Ekalesia Katoliko, e amata mea uma ile Atua, toe faaiu ile Atua, e pei ona osia ai le taulaga ole Misasa Paia e faapitoa mo tupulaga talavou uma ole Ekalesia ma tapuni aloaia ai lenei polokalame.
Ole maualuga ma le matagofie ole faamoemoe ona e toatele tupulaga talavou mai vaega uma o Aukilani sa auai e faapea foi ile tapuaiga a mātua sa faamalumalu ai a’o faagasolo le polokalame ale fanau.
Ole Autalavaou a St Annes Manurewa, Mother of Divine Mercy, Taimua Youth Ministries, Lataki Tongan Youth Group faapea ma le tele o isi Autalavou. E 35 atoa le aofai o Autalavou sa auai i lenei polokalame. E le na’o Samoa foi poo Toga ae sa auai atu ai foi ma tupulaga talavou mai Filipino, Fiti, Initia ma Saina ma ua filogia ai gagana ma lanu o atunuu taitasi.
Ole tāua foi o lenei polokalame ole iloa ele tamaititi le tāua ma le aogā ole foaiina o lona ola mo le Alii. Elē faapea ole alu i tofiga faapatele pe faataupousā, le na faapea lea ua ofoina lou ola mo le Alii, ae e tatau ona iloa e taua foi le faia ose faaipoipoga, poo le ola faapaiaina, poo le nofo toatasi foi ae ia faavaeina lou olaga faaipoipio poo le nofo toatasi ile Alii.
E lē gata i lea, ae ia e iloa ma talia lou faatuatua Katoliko auā o oe ole tupulaga talavou, ole lumanai lea ole Ekalesia Katoliko.
