O se asiasiga mai i Ausetalia a le afioga i le Pule Faatonu o le EFKS TV i Samoa Afioga Tuiasau Uelese Petaia na maua ai se avanoa e faatalanoa ai i luga o le polokalame leitio i Sini le FM89.3 Samoa Sportstar.
O molimau a le atunuu i Sini e autovaa atu i Samoa ua matagofie le iai o lenei Televise Lotu e maimoa ai i polokalame eseese e aofia ai faleaitu, ata tifaga, ata faasolo ma pese faaleagaga ma polokalame i le lotoifale.
Na saunoa le afioga Tuiasau, “O le EFKS TV o le finagalo o le Ekalesia ia faatuina se televise e fesoasoani i le faalauaiteleina o le tala‘iina o le finagalo o le Atua.”
“E lē gata i lea o loo pei lava foi o isi Televise i Samoa nei ma atunuu mamao, o se falefaasalalau, lona uiga e lē gata o Polokalame eseese ae saili lava e latou seleni mai faasalalauga e faatino ai galuega o le auaunaga e aunoa ma le tagi atu i le ekalesia.”
I le tolu tausaga talu ona faavae lenei TV ua amata soo ana pou faasalalau i Upolu ma Savaii aemaise o le auina tuusa‘o atu ai o taaloga lakapi faavaomalo. “O le taamilosaga Ipu o le lalolagi i lakapi faavaomalo a atunuu i lalo o le luasefulu tausaga 2015 na auina tuusa‘o atu mo le maimoa a le atunuu faapea foi le Lakapi a atunuu e ono a Europa (6 Nations).
I lana asiasiga mai Brisbane, Melepone ma Sini na faailoa foi e le Faatonusili le faamautuina o nisi o polokalame faaleagaga mai Televise Ausetalia nei i vaega o pesepesega ma tala faaleagaga.
“O le taumafaiga ia mafai lava e le televise auala e sailia ai ana seleni e tuufaatasi ai polokalame e aofia ai ma tala fou ma totogi o le aufaigaluega.”
O le afioga Tuiasau Uelese Petaia o se Samoa muamua na autu mai se ata tifaga faavaomalo i le 1979, ‘Sons for the Return Home’ na pueina i Niu Sila ma Samoa mai se tusi na tusia e le afioga i le alii Polofesa Maualaivao Albert Wendt.
O le afioga foi ia Tuiasau Uelese Petaia na avea ma Peresetene o le Kalapu Lakapi a Vaiala Ulalei i Samoa, ma sa ia tauaveina le Tofiga o le Pule Sili o le Televise Samoa mai le 1997–2001.
