O le aso 13 ma le 14 o le masina lenei o Me, o le a toe silasila ma faafofoga ai le atunuu i Aukilani i siufofoga faagauloto o alii talavou, Auimatagi Gabriel Paese Si‘a ma Galumalemana AJ Paese Si‘a i le la faili o le OZKI.
O le uluai malaga asiasi mai lea a lenei faili i Niu Sila mo lenei tausaga, ona e pei ona saunoa le taitai malaga o le faatonu foi lea o le OZKI ma o le tuaa o alii pepese, le Afioga Auimatagi Afi Paese Si‘a, e lē gata ina ia tali foi le manaoga o le atunuu o loo tuufesili atu pea poo afea se isi koneseti a le OZKI i Niu Sila, ae o se avanoa lelei foi ua tatala ma faalauiloa ai ma le lipine pese fou a le faili (new album) lea o loo faatomua i se tasi o fatuga o loo iai i totonu, “O‘u Mafaufauga.”
O le lipine pese e 10 pese ua tapenaina ai; o nisi o pese tuai ua toe usuina e le OZKI, o fatuga a nisi o foi o tamalii o le atunuu ua iloga i lenei matata o le musika, ae ua fiafia e toe usu mai e le faili a nei alii talavou a latou fatuga, ma o se faiga lelei foi, ua lē gata ina toe faamanatu mai ai na fatuga ua peiseai ua tau mou atu ona o le tele o musika i lenei talutalufou, ae ua toe siitia ai foi le matagofie atili o nei pesepesega.
O loo iai ma se pese fou na fatuina e le tuaa o nei alii talavou, o le vii o le Aoga Faafaifeau i Malua. Na fesiligia i le mafuaaga ae na saunoa Auimatagi Afi, o Malua e lolotu i ai le latou aiga, ma ua manatu foi, ua fetaui tonu le taimi ua tatala ai le lipine a lana fanau ma le gasolo foi le fonotele a Malua i lenei tausaga.
O le OZKI o se faili o loo matuā fiafia ma lauiloa i Samoa, ona o le tele o meafai ma faafiafiaga a le malo ma faalapotopotoga, e faafiafia ai lava lenei faili. O se tasi o itu o loo sili ai ona tatai le fia faafofoga a tagata e lē gata i le tupulaga aemaise foi le au matutua, ona o nei alii talavou, sa ola ma soifua a‘e i atunuu o papalagi, ae maeu le lelei ma le manino o la faasamoa pe a la toe pepese mai i pese Samoa ua latou toe usuina.
Saunoa le taitai malaga i le mafuaaga o le lelei o le faasamoa a ona alo, auā a o laiti mai ma ola ane i le laumua i Ueligitone, sa amata fofoa mai o la olaga i le Aoga Amata a le faletua ia Fereni Ete o le EFKS Newton; e lē gata i lea o le Aoga Aso Sa sa aoao ai lava le la faasamoa.
O nei foi alo o le atunuu e tupuga mai foi i aiga lava o le musika mai itu uma o aiga o o la mātua. Ae saunoa le tuaa o Gabriel ma AJ, o lana fanau, na laiti mai lava o fiafia e pepese. O le vaitaimi a ua amata ona faataotolia lo la grandfather (tamā o le la tamā) i gasegase o le tino, o le fiafiaga lea o si o la tamā matua, e toomaga i ai lagona mafatia i ma‘i, pe a amata ona ta le kitara a nei tamaiti ma pepese i si o la tamā.
E faapena foi ina ua faataotolia si o la tina i le gasegase o le kanesa e pei ona ua toe malosi mai ai nei, ae i na taimi, o le toomaga lea o le tina pe a amata ona ta le piano ma le kitara a lana fanau ma pepese e faafiafia si o la tina. O le pese sa fiafia tele le alii o Gabriel e pese ai lea taimi, “Ou nofo toatasi” sa usuina e John Parker.
O le itu tāua foi na maua mai e talanoaga ma le taitai malaga o le OZKI ona ina ua fesiligia i afioaga o lana fanau mo le fia faailoaina, na saunoa Auimatagi, o lana fanau na pau le mea e la te faatāua, o laua o Samoa, e malamalama lelei i le faasamoa e pei ona la pepese ai i le la gagana Samoa. O le mafuaaga lena e lē o manao ai e faapatino ni o la nuu, auā o laua e mananao e faafiafia mo Samoa atoa poo fea lava le nuu ma le tupulaga.
O le taimi nei o loo aooga uma Gabriel ma AJ, ae o lenei malaga mai mo a la koneseti i Niu Sila ma faasolo atu i Ausetalia, ona o loo faia tuuaga a la aoga.
O le ala foi lena ua toe faataatia teisi ai le musika, ae se‘i uai lelei e faauma a la aoaoga, ona toe faatulaga ai lea o le musika.
O Gabriel ua 23 ona tausaga ma o loo aoga nei i le Sydney University i lana mataupu faainisinia, ae o le lona uso le alii o AJ ua 21 tausaga, o loo aoga i le USP i Alafua, mo lana mataupu tau Tulafono (Law). Na amata atu a la aoga maualuluga i le Scots College i Ueligitone, sosoo ai Bengla School i North Sydney, seia oo ina ua toe taliu le aiga i Samoa i le 2009, ma faaauau ai a la aoga i le Kolisi a Robert Louis seia oo ina ua agai i le NUS ma faasolo ai i aoga e pei ona iai nei.
