Asia e le OZKI Band laufanua o Aotearoa

Ua leva ona faatalitalia e le mamalu o le atunuu o loo alala ma papaaao i Aukilani se taimi e autovaa mai ai i ona laufanua le faili lauiloa o le OZKI. Ua tele ina aave mai tala i Samoa ma Ausetalia i le matautia o faafiafiaga ma siufofoga malu a lenei faili.
Ae o le po o le Aso Faraile ma le Aso Toonai na silasila ai loa le atunuu i le auso e toalua ma lo la tamā o loo faia le faili lenei o le OZKI. Na molimauina le tumutumu o nei po e lua i le fale faafiafia o le Club Royals i Manukau i le lolofi atu o tagata se‘i faalogologo i siufofoga o lenei auso.
O po foi ia na talitonu ai le au evaeva, ma faia le upu e masani ai le atunuu, ua tele atu mea ua ou vaai i ai i mea sa ou faalogo i ai. Na faamauina e nisi o le au tafafao i ia po le maoae o le taleni ma le meaalofa ua maua e nei alo o le atunuu.
E na o le fā lava aso na iai le OZKI Band i Niu Sila ma o le taimi muamua foi lea ua faafiafia ai i laufanua o Aukilani. O le susuga ia Vili Leilua Ieru ma le kamupani puepese a le Vision Cd & Video World Ltd na latou lagolagoina ma faapolokalameina uma le faigamalaga mai a le OZKI i Niu Sila, ma o le maota lava foi o le susuga Vili ma le faletua ia Luaipouomalo sa faamautu i ai le faigamalaga seia oo ina toe tuuvaa ese atu mo Amerika i le afiafi o le Aso Sa talu ai mo le latou malaga taamilo i le tolu vaiaso.
O le tamā ia Auimatagi Leaumoana Afi Faamausili Paese Si‘a na taitai maia le malaga, faatasi ai ma ona alo e toalua o Auimatagi Gabriel Paese Si‘a ma Galumalemana Afi Junior Paese Si‘a.
Na faaalia e le tamā ia Auimatagi Afi, o lenei faili ua faaigoaina o le OZKI, ona sa amata mai le latou aiga i Ueligitone ona see atu ai lea ma nonofo i Ausetalia. O le uiga o le igoa OZKI: OZ mo Australia ae o le KI mo Kiwi.
O le 1984 na amata ai le aiga i Ueligitone ma galulue i le Ekalesia EFKS i Niutone i le susuga i le faafeagaiga ia Rev Risati Ete ma le faletua ia Fereni Ete. Ma o iina foi sa amata mai ai le taleni a lana fanau i le taina o pese o le lotu ma le Aoga Aso Sa. O Auimatagi Gabriel o le alii lea sa fai ma uso laitiiti o Tofiga Fepuleai, ma sa faaalia le tele o le sao o Tofiga i le taumafaiina o lana taleni.
O le 2001 na tuua ai loa Niu Sila ma malaga atu mo Ausetalia ma nonofo ai mo le 9 tausaga. O Sini na faamautu ma faavaeina ai loa le taleni faatasi ai ma le amataina o le faili. E tele ni avanoa na maua e le fanau e faaauauina ai aoga i mea tau musika. Ae o le 2010 na toe taliu ai loa i Samoa ma nonofo ai seia oo mai i le taimi nei.

Auimatagi Gabriel Paese Si’a ma Galumalemana Afi Junior Paese Si’a

Ozki band