O fea lava tatou te saili malo ai, e lē mafai lava ona galo lo tatou tupuaga ma lo tatou faasinomaga, o le siosiomaga o loo galue ma tautua ai e fanau ma tutupu mai ai moemitiga e fia faatino ma faailoa valevale alofa mo lo ta tupuaga poo le atunuu na tupuga mai ai.
I le aoga tulagalua a le pitonuu o Coolaroo i Saute, e feololo le fuainumera o alo ma fanau Samoa o loo a‘oa‘oina ai, atonu o le mafuaaga lea na faigofie ai ona ioeina e le uluaoga ma lana komiti le talosaga a mātua ma faiaoga Samoa ina ia faia se aso faapitoa e faamanatuina ai le Tutoatasi o le malo e pei ona faamanatuina i Samoa ma soo se tafa o le lalolagi o aumau ai tagata Samoa.
Na tapena ma saunia siva ma faafiafiaga e talafeagai ma aso o le Fu‘a, o le sāsā, mauluulu, faataupati faapea nisi o siva faa-Samoa, ae taualuga i le pese faaleaganuu ma la latou taualuga na faaeva ai le tuiga Samoa, ona alo lea o le aoga atoa i le taumafataga faa-Samoa moni na tapenaina e mātua ma faiaoga.
Saunoa le susuga i le puleaoga, e ui i le toaitiiti o tagata Samoa o nopia‘i i Melepone ma Vitoria, ae ua faaalia i lenei aso le lotonuu ma le fai mea mafai. Na viia e le komiti le matagofie o tu ma aga aemaise o faafiafiaga faa-Samoa moni, e pei foi ona molimau mātua ma le mamalu mai isi atunuu, lea faatoa silasila ma maimoa i siva faa-Samoa.
Faaalia le finagalo fiafia o le puleaoga ma ia saunoa ai e mafai ona faataunuu i tausaga uma pe a tusa ma finagalo o mātua ma faiaoga Samoa. O se tulaga o le a soalaupuleina e le mafutaga a mātua ma faiaoga Samoa.
