Ole fono matagofie ma le logomalie na usuia ile afiafi ole Aso Tofi, aso 3 o Novema ile Iuniveste a Griffith, ole uluai taimi lea ua tāpā ma moomia ai finagalo faaalia mo se faasoa i fuafuaga faataatitia auā se lumanai manuia o vaega o polokalame tau a‘oa‘oga a Maori ma tagata Pasefika. Ole tele o popo e sua ai le lolo, ole tutū faatasi ma fefaasoaa‘i o manatu ma lagona e manuia ma solosolo lelei ai se faamoemoe.
Na muamua sii mea i Matautu Sa e lana auauna ia Pastor Manuia Aloalii ole ekalesia Hosanna Church i Slacks Creek, sosoo ai le saunoaga matagofie a faufautua a Maori ma tagata Pasefika e iai le tamaitai o Seugamalii Josephine Aufai.
Na ia saunoa ile faatāuaina o i latou oloo lagolagoina ma a‘oa‘oina alo ma fanau, ma ia ta‘ua foi le tele o vaega lelei oloo feagai ma le komiuniti ma aoaoga, i latou oloo tutufaatasi, faalauaitele, faaailoa ma tautino sootaga ma le komiuniti.
Na tauaaoina atu e le tofa ia Seugamalii Josephine (Pacific Island Education Advocate) se tanoa palu‘ava ia Sharyn Donald (South East QLD Regional Director), ose faailoga e faamausali ai ma mauaa ma le agai pea i luma o lenei faigapaaga.
Na faalauaitele lana saunoaga, ma ia faasoa ma otooto mai se ata atoa o lenei savaliga ma lona tulai mai na fafau mai ai ni auala ma ni metotia e fafoe ai lenei galuega lea ua tino mai.
Ole lua tausaga ua tuanai na atiae ai ma fofoa mai ai le tau amataina o lenei faalapotopotoga a faiaoga (Maori Pacific Island Education Reference Group) ma faavae mai ai se tatupu ia ola mai ai se moemoe fou mautu mo le lumanai auā tamaiti Maori ma le Pasefika.
Ose afiafi na tuufaatasia ai faiaoga eseese ma le komiuniti e talanoaina o latou manatu ma lagona e agai tonu i o latou faamoemoega ma naunautaiga auā le faatupulaia pea ole fuainumera o tamaiti Maori ma le Pasefika.
O Koke Leleisiuao na fai ma fofoga ole po na ia faafeiloai aloaia tagata e ona laufanua e pei ona auai Aunty Robyn, ole ta‘u lea ise tagata Apoliki.
Ole tamaitai o Judith Kearney (Associate Professor) na ia valaaulia faapitoa Dr Meaola Toloa mai Niu Sila e faasoa mai sona tomai ma se silafia i fuafuaga faataatitia oloo mauaa ai aoga a Niu Sila e fai foi ma luitau ma faamalosiau i faiaoga a Kuiniselani auā le agai i luma.
Na faafaigofie ma mae‘a vaega uma o lea po ona ole lagolago ale faletua ia Jodie Silao (MPI Education Advisor), ona faaiuina ma taualuga lea ole po ise taumafataga sa saunia lava e nisi o sui ole polokalame a Maori ma le Pacific Island Education Reference team.
