Aoao manogi malu o le malo mai tina Samoa


O le Aso Toonai na tuanai atu nei na fai ai le saofaiga a le matagaluega a malu o le malo a le setete o Vitoria ma le itupa o tina ma tamaitai a le Fono faufautua mo tagata Samoa i Vitoria {VicSAC} pei ona faasalalauina i le vaiaso talu ai sa faia ai le saofaiga faapenei ma le itupa o tama.  O le auga o aute o le faamoemoe o le aoao manogi lea o le matagaluega i le fia maua ose malamalamaaga i mafuaaga o faatupulaia ai pea le sauaina o tina ma fanau i totonu o aiga Samoa, na maitauina le faaauau pea o le mau masani a tina e au la latou inailau ona sa toaitiiti nai tama sa auai i le faatalauula ane a le matagaluega o leoleo, peitai i le aso o le feiloaiga ma tina na faafiafiaina ai le fomai {doctor} na fai ma sui o leoleo Dr Hussein ma lona soatau tamaitai i le lagolago malosi ma le toatele o le itupa na auai atu e tali le manaoga ma faasoa o latou finagalo.  O le anavatau a le matagaluega o loo tau aoao ai faamatalaga ma finagalo o tina, ina ia fau ai se togafitiga mani fofo mo lenei faafitauli aemaise lava mo nai alo tamaitai o tutupu a’e, o le finagalo foi o le malo atonu e aoga foi mo nisi atumotu o le Pasefika, ae mo le taimi nei lava ia, o loo maualuga le manaomia e aiga Samoa se fesoasoani.

Na saunoa malu o le malo i le mae’a ai o le mafutaga, na o la maitauina le saoloto o saunoaga ma finagalo faaali o tina, atonu ai ona o le saofaiga sa na o lo latou lava itupa, e le’i i ai foi se pa pupuni na saisaitia ai saunoaga tuusaoloto.  E le sua se lolo ise popo se tasi, ae o le silasila a le Fono, ia aoga nei feiloaiga faatasi ma nisi o fuafuaga alualu i luma fai faatasi ma leoleo, e maua ai se vailaau aoga mo le gasegase ogaoga, aua o tina o le ola lea i totonu o aiga, ae le oni pologa, faapea foi nai fanau o le tofi lea mai le Atua.